<County: Berkshire>
<Code: L6810>
<MS reference: Cambridge, Corpus Christi College 145>
<Text: South English Legendary>



<fol. 15r>¶ Certes quaþ þis enchanteor . þat me ssel 3itte yse
þt alle þi wiues children . under hur~ ssolleþ be .
For þis womman ssel a+do3ter ber~ . þt ssine ssel so cler~
Amang alle þt an eorþe beþ . in as cler manere
As amang alle oþer sterren . þe sonne bri3tor~ is .
Also ssel he an eorþe ssine . amang oþer men iwis .
In a god time he worþ bor~ . & wonderliche also
For noþer wiþ-Jnne hous ne wiþ-oute . þe dede worþ ido .
Duptak was þo do3terles . for he nadde neuere none
Joiuol he was and glad Jnou . for he bihet hur~ one .
Suþþe it biuel þer afterward . þt anoþer enchanteor wende
And of duptak bo3te þis seruante . as our~ louerd grace sende
For þe wif nolde neuere sine . ar it were þerto ibro3t
Ac þe child þt was in hur~ wombe . duptak ne solde no3t
Forþ he ladde þis womman . þat he hadde dere ibo3t
And weddede hur~ as is owe wif . & uolwede is þo3t
¶ So þt a+quene of þe londe . gret mid childe was .
& was upe þe point to habbe child . wanne our~ louerd 3af ye cas
Of þe chanteor he let of esse . wanne god time wer~
3if it wer~ ilor~ þe oþer sede . as mi bok me deþ ler~
Jn þe morwenynge to morwe . wanne me may þe sonne ise
Þer ne ssolde . in al þe worlde . þe childes per be
þo bad þe quene uaste . þt it moste be þo ibore
And þo ne abod it no3t so longe . ibore it was biuore
Ac þis womman þt was mid childe . mid þis holi þinge
Aros up to milki hur~ kun . al in þe morwenynge .
And ri3t as þe sonne aros . hamward a3en he com .
And þis milk al hot ymilkid . in a boket he nom .
As he com to þe halle dor~ . hure ouot wiþ-Jnne was
And hur~ oþer uot was wiþ-oute hur~ uel a+wonder cas
vpe þe þresuold he nel adoun . & hadde child ri3t þer
Noþer wiþ-Jnne hous ne wiþ-oute . þis holi child he ne ber
In þe time þat was so god . as hur~ hosebonde sede ene .
Wiþ þe milk al hot imilked . þt child he makede clene .
In þulke time of gode wate . þis child ibore was
þat þe quene wolde habbe iheued . as hur~ uel ambes as
¶ þis child wax & wel iþei . and to eche gode drou
For he hadde grace of god . and gode wate Jnou
He nas bote of wel 3ong elde . ar our~ louerd on hur~ þo3te
& mony fair miracle & swete . alday for hur~ wro3te .
<fol. 15v>As þis child sat aday . in a+wonder cas
Hure heued iheled wiþ acloþ . as it ofte was
þo þo3te hur~ steffader & hur~ moder . & alle þt hur~ seie
þat cloþ was al avure . and stod ali3te li3e
þe moder dradde of þt child . þt it ssolde hur~ lif for gon
To quenche þat fur uaste he orn . & þone+fonde non
He wende it wer~ bernynge vur . ac he fond þo it nas
Ac li3t of þe holigost . þat aboute þe childe was
¶ þis enchanteor hur~ steffader . at one time aslepe+lay
Tweie wite cleriones . in a uision he say
stonde bi þis holy maide . upri3t in eiþer side
And hulde oile uppon hur~ heued . & nennede hur~ bride
And sede ouer hur~ orisons . as a+preost wolde do
wanne he uolleþ a+child . and baptizeþ hur~ also
wat were þat bote angles . þt fram heuene wer~ ali3t
þat baptized þis holy maide . & nennede hur~ name ari3t
¶ þo þis child eldore was . it biuel in aday
þat he stod in orisons . as muche now isay
þo hurde hi aman wiþ hur~ speke . ac hi ne seie him no3t
And þis maide spak ek wiþ hym . & stod ofte in þo3t
Atte+laste þis maide sede . þis wordes one þere
Al þis is min . al þis is min . men wondrede wat it wer~
þis maide seiþ soþ quaþ þis oþer . for also it wole wende
For al þis place ssel our~ be . to þe worldes ende
So it was for þer is 3itte . a churche of sein bride
And a+gret parisse in hur~ name . þt lasteþ longe & wide
After þe tyme þt þe maide . þat holy word sede
Men þt louede muche har~ lond . wer~ þerof in gret drede
To þe enchaunteor hur~ steffader . hi come ofte & sede
þt he ssolde þat maide anon . oute of þe londe lede
Oþer he ssolde him-sulf bileue . & lete hur~ of londe fle
þat sede in hur~ prophecie . þt þulke lond ssolde hur~ be
þat certes quaþ þe chanteor . þat ne ssel it neuere mo
Jchelle raþer 3ou bileue . & awei mid hur~ go
þo it ne+mi3te non oþer be . þe enchanteor hur~ nom
And ladde hur~ out of þulke+lond . & into anoþer com .
Suþþe he brou3te hur~ to hur~ uader . as forward was byuor~
Of hur~ hur~ uader was wel glad . þt he euere was ibore
Muche wiluede al þt folk . þt maide forto ise
And he+was ioiuel Jnou . þat ne hur~ mi3te be
<fol. 16r>¶ So þat an holy wydue . þat wonede þer ssuan ende
Sed duptak þat þis maide . moste wiþ hur~ wende
þere muche folk was in astude . as he hadde to done
þo þis widue hadde leue . þis maide he tok sone
And wende touward þulke stude . as al þis folk was
A wis+man þer lay aslepe . among al þis folk bicas
þo þo3te him in auision . þat he oure leuedi ysey
Cominge softe þuderward . and þat he was ney
Joiuol and glad he was Jnou . For þis holy si3te
Gret gome he nom of hur~ forme . as ueruorþ as he mi3te
Mid hur~ þer was him þo3te anoþer . þt þeos wordes sede iwis
Lo þis is þe holy marie . þat amang 3ou an eorþe is
Mid þis word þis man awok . for ioie he gan to crie
On he seide non ich isei . oure leuedy seinte marie .
And seide hom al wat he hadde on . & wat forme he was .
þo com þis maide among hom . in mid þis worde ri3t bicas
¶ Anon so þis man isei hur~ come . he gan to crie an hei .
Lo here he sede þes wete leuedy . marie þt iche isei .
Of þe forme þt ich 3ou habbe itold . for ich wot wel it is he
Gode leuost hom þo3te he was . þat mi3te hur~ eues ise
Honoured was seinte bride . as our~ leuedi ri3t þere
And muche of þe uolk wende . þt our~ leuedi sulf it wer~
Our~ leuedi dude hur~ gret honur . þt hur~ owe forme hur~ sende
And made hur~ honured as hur~ sulf . as muche þt folk wende .
¶ Suþþe wende þis holy maide . to hure moder anon .
Twelf gode kun hure moder hadde . þt muchel wer~ echon
Hure moder & eke hur~ hosebonde . toke þe maide to welde
Chese and botere & hore kun . acom and eke auelde
And al þe wit þat þere was . þat he ssolde up hur~ helde
And a certein day þer of . triwe acontes 3elde
¶ þat maide gaderede swiþe clene . þe milk & þe chese
Dotere and al þt þer of com . nolde he noþing leose
wanne he sei eny pouere men . he delde hit hom wel clene
þat euere was hur~ dei3erie . of wi3t bar and lene
wanne hur~ day was ney icome . a contes forto 3ulde
Of hure moder he was sore adrad . glad he was wel selde
3erne he bad our~ louerd crist . þat ssolde be our~ red
He nadde war of acontes 3elde . as hur~ moder hadde ised
¶ Ac þo þe day was icome . he nuste war wiþ hur~ quite .
For he nadde in hur~ dei3erie bote wel lite of wite .
<fol. 16v>Naþeles þe moder þuder 3eode . to loke hou it verde
He fond ech lome iheped up . al aboute þe brerde
Of chese and of botere . and of oþer wi3t also
Ne ssel he neuere is wille leose . þt for our~ louerd wole do
wo so hadde such a deie . He ne dorste no3t by mene
þei is wi3t were ofte issad . oþer is kun leue
For þulke miracle hure steffader . louede cristendom
And byluuede ferst in ihesu crist . and cristen man bicom
¶ Hit bi uel þer afterdward . þat þis maide aueld wende
Forto lokie to hur~ ssep . & so gret rein our~ louerd sende
þt hur~ cloþes al wet were . a3en he gan gon .
To drie he wolde is honge . as he ne sai no3t waron .
þe sonne sson Jn at an hol . up þe bem of þe sonne
Hure wete cloþes he heng to drowe . þt al & water ronne
Me þingþ he ne dorste carie no3t . þerche forto finde
wanne he wolde hur~ cloþes honge . & þe sonne ssinde .
þis holy maide wiþ hur~ moder . to hur~ uader suþþe drou
And was wiþ him as he was er . as him þo3te longe Jnou .
For al he 3ef poueremen . þt he mi3te hond on sette
For al þat hur~ uader mi3te do . He ne mi3te hur~ þerof lette
¶ þo he hadde iserued him lange so . in wraþþe & cheste Jnou .
He nom & ladde hur~ to sulle . and toward þe kynge drou
þo he com to þe kinges court . as he hadde iweon aboute
He wende alone . into þe kyng . and let þe maide wiþoute
He bitok hur~ is swerd to wite . leuost of alle þinge
For it was god and riche Jnou . & for he it hadde of þe kinge .
He wende him biuore þis king . & spak wiþ him is fulle
Said is do3ter þt was so god . chepede him to sulle
¶ wi woltou sulle quaþ þe kyng . þi do3ter þt þe is so leof .
Sire ich mot nede quaþ þis oþer . for he is a+strang þeof .
For he stelþ outlich alle þing . þt he may hond do
And 3ifþ it aboute Jnot ware . þt me come neuere þerto
þe wile þis men wiþJnne wer~ . & speke her~ aboute
Anoþer tripet to hur~ uader þis maide dude wiþ oute
For a+beggar~ com & lad hur~ god . & he 3af him anon .
Hur~ fader swerd þt was so leof . & het him forþ gon .
As god hadde hur~ fader ile . to habbe wiþ him ibore
Oþer itake anoþer to loke . þt he nadde no3t ilore
¶ So þat þe vader wende him out to bringe biuor~ þe kinge
He com & miste is gode swerd . leuost of alle þinge
<fol. 17r>He was ney for wraþþe wod . he nuste wat do for teone
þer ri3t he wolde hur~ habbe aslawe . bote as men 3eode bitwene
He ladde hur~ Jn biuore þe kyng . and tolde al hur~ dede
Nou leoue do3ter quaþ þe king . hou þenchestou þi lif lede
wy hastou þi uader swerd . so foliche awei ido
þat ich him 3af for grete loue . & þt him was so leof also
¶ For gode sire quaþ þis maide . 3if ich hadde poer
Of him sulue oþer of þe . as prout as 3e beoþ her
And a pouere man for godes loue . me bede þt ich 3ou 3eue
For al 3our~ prute ne 3our~ loue . siker ich nolde bileue
þat ich nolde 3ou 3iue for godes loue . & al 3our~ god þerto
J+nolde it bileue for no drede . 3if ich mi3te do
¶ Nou makestou þe quaþ þe king . gret maister iwis
God ssulde us dame fram eche stude . þer þi poer is .
Duptak þis maide is to deore . þt J ne may come þerto
To deore he is me to bugge . and þe to sulle also
For J ne mi3te no3t reime þt tresour . þt wel to lite nere
þere uore beoþ to gadere 3ut . as þe byuore were
¶ þis maide he 3af a god swerd . hur~ fader forto take
To bymme his wraþþe & isloþ . acord forto make
And made acord bytwene hom . and bed hom goday
þis godeman nam is do3ter hom . þo he non oþer ne say
And weste fram hur~ is god . as fer norþ as he mi3te
Ac no3t so þat euere among . somþing þat maide di3te
¶ Suþþe it biuel þer afterward . þt þis maide ssolde
To agret duk yspoused be . as al hur~ vrendes wolde
Hure uader it wolde þoru alle þing . & bad hur~ be 3ar~ þerto
þis maide spak euere faire ac he . ne þo3te hit neuere do .
He bad our~ louerd ni3t & day . hur~ wissi and rede
And sende hur~ þane deþ uppon . þanne do þulke dede
er binime hur~ on of hur~ lymes . oþer som lat hur~ sende
war þoru þe mannes herte . fram hur~ mi3te wende
¶ Oure louerd hurde hur~ bone wel . & hur~ on ei3e hur~ bynom .
þt it ne bileuede in hur~ heued no3t . he nuste war it bicom
Gret angwisse he hadde snou <?s mistake for j> . and naþeles he was sawe
Anon þis 3onge man þis isey . his herte he gan wiþ-drawe
¶ God schulde me he sede . to ssende my sulue so
To wedde an on eyde quene . J nelle it neuere do
wel leouer hure was to leose hur~ ei3e . 3e perde boþe to
þanne to be iwedded wif . folie forto do .
<fol. 17v>were wymmen ivare nouþe so . wo so wolde 3eorne crie
As wel we mowe segge nay . wat halt it to lye .
Ac seinte bride leuer was . as it seiþ in þe gospelle
To heuene wende wiþ on ei3e . þanne wiþ tweie to helle
¶ þis maide þo hur~ fader biso3te . þt he nere þer a3en no3t
To 3iue hur~ leue to be . nonne . as he him hadde er iso3t
þo hur~ uader isei þt it was . to hur~ þt lefte lif
For wanne he imaymed was . he nere no3t to be wif
He 3af hur~ leue to be nonne . Swyþe glad he þo bicom
wel be tyme he wende vorþ . & þen holi ueil nom .
So sone so he was none imaked . & iconfermed also
Of þe bissop faste Jnou . þat it ne mi3te no3t be vndo
Oure louerd hur~ sende hur~ ei3e a3en . as god as he was er
For he may binde & unbinde . as it was isene þer
Ne der noman esse wer he ladde . god lif & clene þo
Miracle he dude many on . and mony mon he bro3te of wo
¶ Meseles come to hur~ aday . a þurst and acale
Dede hur~ some drynke for godes loue he nadde asope ale
Auat þer stod of baþ . he 3ef it hur~ blessinge .
þe beste ale alyue it bicom . he 3ef þe museles drinke
¶ þer com ek a womman & bad hur~ salt . & he nadde ri3t non .
Mid ablessinge he turnde to salt . agret hard ston .
¶ þre sike men eke hur~ bede god . as hy to hur~ come
A selueren coppe he 3ef hom . and hi gladlich hit nome
So þat hi bigonne to striue . hou hi hit dele mi3te
Abideþ sede þis holy maide . ich it wole euene di3te
þis coppe he smot a3en aston . þt he wond aþre .
Euerich is del ilyche muche . as euene as it mi3te be
¶ þis miracle and many oþere . þis holy maide wro3te
Boþe blinde & dombe also . to gode hele he bro3te
Atte+laste as god it wolde . touward deþe he drou
Biuore hure deþe he was iwar . þerof longe Jnou
þe ferste day of feuerer . hur~ lif he bro3te to ende
God lete us alle forþ wiþ hur~ . to þe ioie of heuene wende
SEin blase wel clene lyfe . ladde wiþ-oute hore
Jn þe lond of capadose . þis godeman was ibore
For is godnesse cristen men . bissop him wolde make
Nolde he no3t of such poer . ac gan it anon forsake
For he nolde it be in none manere . he flei oute of londe
To a deop valei3e of wildernesse . & þare began at stonde .
<fol. 18r>Priueliche he wonede þer . and hudde him swuþe longe
And seruede our~ louerd wel in penaunce swyþe stronge
¶ wilde bestes þat þere were aboute him come þicke
To solaci him for he was one . his limes forto licke
wanne eny of hom sike wer~ . to him hy wolde anon
And ar he hom hadde iblessed . hy nolde auot gon .
¶ þe luþer Justice of þe lond . þat het agricolas
Sende adai is man an honted . þer as þis godeman was
And as hi wende hi þo3te wonder . þat hi souen deor uonde
Hy bihelde in þe depe valeie . and iseie in þe gronde
Swyþe uale deor aboute aman . þt sat him amidde
And bihuld to heueneward . is beden forto bidde
¶ þis bestes alotte to him also . in gret þo3te þis honten wer~
Hy wende and tolde þe Justise . wat hi seie þere
A het hom wende & seche anon . & 3if hi fonde gon
Eny cristen man þat hi ssolde . byuore him bringe anon
þo hi come & sein blas uonde . hi seide þou sselt arise
And come wiþ us & speke atom . wiþ our~ Justice
¶ Mi leue sones sein blas sede . 3e beþ wel wolcome
For non ich wot þt mi swete louerd . to me haþ game Jnome
Go we nou vorþ in is name . ich wot he wol us lede
Ne bileueþ no3t to do by me . al þat 3oure maister sede
As hi ladde þis holy man . touward þe Justice
Prechinge he turnde many man . to our~ louerdes seruise
Blinde and deue & dombe also . & þter siknesse hadde
Mani on he to hele bro3te . as me him forward ladde
wilde bestes þt sike wer~ . to him ourne also
As me him ladde & sette hore hele . as hi hadde ofte ido .
¶ As a+3ong child et is mete . abou sset in is þrote
Astrangled and ded he lay . þo it was Jn jssote
Na+mon children nadde is moder . gret deel he made mid alle
And to uore him he bar þt child . & to fore is vet gan ualle
And bad he ssolde hure sone hele þis gode man is hond nom .
And blessede it& þt bon out sset . & þt child hol bicom .
¶ Louerd sede þis godeman . grante me mi bone
þat man in þulke vuel þe bit . ihurd him louerd sone
3if he seiþ þis wordes to þe . louerd crist þin ore
For loue of sein blas þi sergant . helpe us of þis sore
To þe worssipe of þin holy name . woso bit our~ louerd þis bone
For loue of sein blas in god entente . he worþ ihurd sone