<County: Cumberland>
<Code: L0535>
<MS reference: Carlisle, Cumbria Record Office, DSEaglesfield Deeds/1440-41 (Ellenborough)>
<Text: Agreement>


Hyt is for to haue jn mynd that ye xiiij day of fever~-3er~ ye 3er~ of ye kyng henry vj ye xix at alnburgh hall be ye mediacyonn stirryng & mocyonn off
John of eglesfeld ye elder~ Nicholas of redlee . Maister thomas eglesfeld and richard of beaulieu . for es ryst and tranquillyte of elizabeth ye wyf of ye
Said John and John hyr son heir~ apparent to John abown~ said . hit ys a-cordyt agret & apoyntyt be-twys ye said elizabeth and John ye sonn
That yf yt hap ye John of eglesfeld ye elder dee levyng ye said elizabeth and John ye son~ That yan ye said elizabeth Sall haue ye Syt of ye maner~
of alnburgh wyth all ye demayn~ landes alnbank myln medovs serwys and yair~ apurtenance to haue & hald to ye sam elizabeth term~ of hyr~ live
acordyng to ye fvrm~ and bowndys lik as yai er~ in ye handes and possessyones of John of eglesfeld ye elder day off yis agrement noght agayn~ standyng ony
titill of inheretance of John ye sonn in ye said landes For ye whilk John ye son~ sall haue ye maner~ off eglesfeld wyth all ye apurtenance to haue and
to hald to John ye son acordyng to ye tytill of hys inheretance noght agaynnstandyng ony titill or possessionn of ye said elizabeth in ye said maner~
also hit ys a-cordyt yat all oder landes and tenementes rentes and serwes with yair~ apurtenance ye whylk sall descend to ye said John ye son@ in demen~
or of ye whylk ye r~vercyon~ sall descend or aght to descend to ye said John ye sonn be ded of his fader or hys moder sall evynly be departyt be-twis ye
said elizabeth and John ye sonn . be ye sixt of John of lamplogh . Nicholas of redlee Maister thomas eglesfeld and richard of beaulieu or twa of ya<m?> <ill><1 word></ill> haue
and to hald to ye said elizabeth ye ta halfe term~ of hyr~ live . ye toder halfe to ye said John son~ acordyng to ye titill of hys inheretance . For ye whylk
agrement and acord devly and trevly to be+had & parfownest of ye party of John of eglesfeld ye sonn . John of eglesfeld ye fader of hys god will has grawn
tid a annvite of iiij marc~ term~ of ye live of John@ of eglesfeld ye elder . and for surte . of yis agrement trewly to be kepyt & parformyt on ye partys
of ye saides eli3abeth and John ye sonn . ye said eli3abeth & John er~ bodely sworn on a buk in presance of John of eglesfeld~ ye fader . Nicholas of redlee
Maister thomas eglesfeld~ richard of beaulieu robert of eglesfeld and Jammes of eglesfeld and oder~ . Jn wytnes of ye whylk ath and concord ye saides eli3abeth and John ye son@ to yis wrytyng has set to yair~ sellys . and be yair bath assent yai haue delivert yis wrytyng to ye kepyng
off M thomas eglesfeld for variance <?> to shew in tym~ commyng gyf yt ned