<County: Cumberland>
<Code: L1188>
<MS reference: Kendal, Cumbria Record Office, WD/Ry/92/77>
<Text: Commitment to arbitration>


Thys acorde made Jndentytt in ye presens off ser william off ye Legh kneght and william off Stapiltoun yt tyme
schyrref of Cumbyrlande and oyer att Cokyrmouth ye xiij day of ye moneth off Januarij ye 3ere off our~ lorde kyng henry
ye v . efftyr ye conquest ix be-twene Cristofir off Berdesey on ye ta part and John of Rybtoun on~ ye toyer parte wittnas
yt ye Forsayde Cristofir & John sall be bwn~ aythyr to othyr in a oblygacoun of a . C . li off lele Jnglichys
mone off all maner off maters moscyons claymys and chalandys moffitt and for+to be moffitt be-twene ye
partys Forsayde towchand ye Maner off Clyfftoun wt ye apurtynans and off all maner of ryghtys pertenand to ye forsayd
Maner wt ye apurtynans on~ owthyr party moffitt and ye Forsayde Cristofyr sall bryng a letter off atournay Fra all
ye feffeis off ye maner of Clyftoun iff yar~ any be swa yt ye arbeturs may mak Fynell end be-twen~ ye partys
Forsayde or ellys ye nownper~ iff any sall be chosyn~ . And att yis acorde For to be Fulffyllytt on~ aythyr
part wt-owtyn~ Frawde or gyle . And ye Forsayde Cristofir sall bryng on hys party iij arbeturs yt es to say
huchon off Sallkeld ye eldyr John off Broghtoun and Robert off Crakanthorp off ye qwelk iij ye Forsayde
Crystofir sall take ij iff yay may be getyn~ or ellys oyer ij lyke in yayr~ stede and ye Forsayde John off Rybtoun
sall bryng on~ hys party iij arbeturs yt es to say . william off Stapylton@ ye 3ongyr Robert off Carlell ye eldyr
and william of Dikys off ye qwylk iij ye Forsayde John off Rybton@ sall take ij iff yay may be getyn or ellys
oyer ij lyke in yair~ stede . And all-so itt es acorditt be-twene ye Forsayde Cristofir and John off Ribtoun yt all yer
maters mocyons chalandys and claymys forsayde sall be determynytt by ye iiij arbeturs Forsayde and in ye Fourom~
Forsayde on~ ye monwnday in ye furst hale woke off lentyn in ye kyrk off ye Frers menours in Carlell nex efftyr
ye Dater off yis present~ and all-so itt es acorditt be-twene ye Forsayde Cristofir ande John of Ribtoun att iff ye iiij
arbeturs may noght acorde yan~ sall ye Forsayde iiij arbeturs chese ane off ye kyngys Justys & yt Justes For to determyn~
and fynell end<hole>ke and Jugmentt gyfe off all maner off maters moscyons claymys and chalandys in fowrom~
be-forsayde be-t<hole> Forsayde Cristofir and John off Ribtoun by ye Feste off saynt Martyne in wyntyr next
Foluande efftyr ye Dater off yis present . <exp>and</exp> and all-so iff ye Forsayde Cristofir or John off Ribtoun may noght hald
ye day of ye arbetracoun in Fowrom~ forsayde yan sall ye party yt may noght hald ye day make warnyg to ye toyer
party viij dayis be-Fore ye monunday off arbetracoun be-Forsayd . And yan~ a-noyer day sall be ordanytt For to be
haldyn~ be-twene Cristofir & John of Ribtoun in ye Fowrom Forsayd be-For~ ye Feste of Pentecost next
Foluand effter ye Dater off yis present~ by ye assent off ye Forsayde Cristofir and John off Ribtoun and all-so itt es acorditt
be-twene ye Forsayd Cristofir & John off Ribton@ att iff nane end nor acorde be made in yer maters and cawsys
Forsayde be-Fore ye feste of saynt Martyne in wynter yan~ sall ye Forsayde Cristofir gyff agayne ye rentes & ye Fermys
to ye tenantys off qwame he yayme toke fra ye day off yis acorde makyng vn~-to ye Martynmes day next
Foluande effter and all-so iff itt be awarditt by ye arbeturs or ye nonpere in ye fowrom Forsayde agaynys ye
Forsayd Cristofir yan~ sall ye Forsayde Cristofir gyf to ye Forsayde John off Ribtoun all ye rentys and ye
Fermys tane by ye Forsayde Cristofir Fra ye day off ye makyng off ye acorde vn-to ye day off ye awarde geue
by ye arbeturs or ye nonpere and all-so yt all yer maters in Fowrom~ Forsayde lely be Fulfyllytt wt-owtyn frawde
or gyle aythyr party changabillment settes to yayr~ sele & bodely assuritt And iff all yir maters in thys
present Jndentur be Fulffillitt in Fowrom~ Forsayde swa ye obligacoun made be-twene ye Forsayd Cristofir and
John off Ribtoun hase lost hys force & hys strengh othyrways itt standys in force and vertu And all-so
itt es acorditt be-twene Cristofir off Berdesey & Robert off ye hemor~ ye eldyr sall stand to ye award of
ye arbeturs forsayde off all maner off actouns reall & personell be-twen yayme ij For to be mofitt or put+forth
and to this lely to be fulfillitt aythyr party es bodely assurit by ye trowth off yayr bodys