<County: Cumberland>
<Code: L1249a>
<MS reference: Carlisle, Cumbria Record Office, D/Lons/L/Deeds/Wg.15>
<Text: Marriage settlement>


This indentur~ mad at Graystok the xxiiij day of August the rene of kyng Edward the fourte seth the conquest of
Jngland the xij be-twix will Gernet late of dalmane<?> on yat on part And Robert warwyk son of Johnn warwyk
on yat other~ part witnes yat ye sayde partes er agreed & a-corded in forme yat folowes yat is to say yt Nich~
Gernet son & hayr~ to ye forsayde will Gernet sall wed & wt grace of god tak to wyfe Margaret the doghter
of the forsayde Robert warwyk & hayr~ to Johnn Newbe lat of Newbe in Comerland For the qwech weddyng
a-bouyn rehersed trewly to be made & done the sayde will Gernet sall pay or mak to be payed to ye
sayde Robert warwyk or to hys certane attornay xl mark of lawful money of Jngland in forme & at
dayes her~-efter folowyng yat is to say xiij mark wt-in xx dayes efter Michelmes next cumyng xxvj [s~]
viij d at Candilmes next cumyng And xxxiij s~ iiij d at witsonday next cumyng efter yat And at ye
fest of saynt Martyn in wyntyr~ ˆ [next cumyng efter yat] xxxiij s~ iiij d And at witsonday next cumyng efter yat xxxiij s~ iiij [d]
And at Mertynmes next cumyng efter yat xxxiij s~ iiij d And at witsonday next cumyng efter yat
xxxiij s~ iiij d And at the fest of saynt Mertyn in wynter next~ sewyng efter yat xxxiij s~ iiij d .
And at witsonday next sewyng efter yat xxxiij s~ iiij d And at Mertynmes next sewyng efter
yat xxxiij s~ iiij d And at witsonday next sewyng efter yat xxxiij s~ iiij d And at the
fest of saynt Mertyn in wynter next sewyng efter yat xxxiij s~ iiij d in ful payment of the
xl mark For the qwech paymentes wel & trewly to be don & payed the sayde will Gernet sal
be bown wt sufficient surte wt hym to ye sayde Robert warwyk i<?> seuerall obligaconns acordyng
to yes Jndentur~ And if the forsayde Nich~ dye as god defend a-fore he hafe at do wt ye
sayde Margaret fleschly than Johnn the son of the sayde wil3am
to wed the sayde Mar<ill><a tear in the margin></ill>
And if the sayde Johnn dye as god defend a-fore he hafe at do wt the sayde Marg~
fleschly than lancelot son of the sayde wil3am to wed the sayde Margaret And if
lancelot dye as god defend a-fore he hafe at do wt the sayde Margaret fleschly yan
James son of the forsayd wil3am to wed the forsayde Margaret if law of haly kyrk will
suffer~ And if the forsayde Margaret dy wt in any day of paymentes than the sayde
will Gernet to be relissed of al paymenttes vn-payed Also if the sayd will Gernet
or hys Assign@ will lowse iiij mak lyvelot in Allerdale qwelk ye sayde Johnn Newbe
layde in Morgage than the sayde will Gernet or hys Assign@ to hafe the sayde
lyvelot to he hafe takyn vp hys costes And than the forsaydes Nichol & Margaret
to hafe it to yer awne proper~ vse And to all condiconns agrementes forsaydes dewly and
trewly to be done & performed in forme forsayde the partes er~ ather~ to other~ bodyly
insured And for the more surte her~ of the sayde partes sal+be ather~ to other~ ˆ [bown] wt
surtes wt thaym in seuerall obligacouns of xl mark Jn witnes her~-of the partes
a-forsaydes to ye partes of yis Jndentur~ enterchangeabilly as set to thayr~ seales
the place day & 3er~ a-forsayde