<County: Gloucestershire>
<Code: L7170>
<MS reference: Oxford, Bodleian Library, Ashmole 43>
<Text: South English Legendary>


<Tranche 1>

<fol. 72r>Al an tide of þe day : we wer~ in derkhede
Ate laste our suete lord : verrore ous gon lede .
So þt we seie an <exp>e</exp>ilond þuderward our scip drou3 .
Bri3t it is as þe sonne : joie þer was jnou3 .
Of tren & herbes þicke it stod : biset in ech side .
Of presious stones ek : þt scynde bri3t & wide .
Ech herbe was vol of floures : & ech tre vol of frut .
Bote it wer~ in heuene sulf : nas neuer more dedut .
þer-jnne wiþ joie jnou : wel longe we gonne wende .
þei it lute wule ous þo3te : we ne mi3te fynde non ende .
So þt we come to a+water : cler & brizt jnou ;
þt euene framward þen est : toward þe west drou .
We stode & bihulde aboute : vor we ne mi3te no3t ouer wende .
þer com to ous a+3ong mon : swiþe vair & hende .
He wilcomede ous vair~ euerichone : wel mildelich~ & suete .
& anempned ech is ri3te name : & wel vair~ ous gon grete
& sede 3e a3te ihesu crist : þonky wel wiþ ri3te .
þt sceweþ of is priuete 3ou : so muche & of his mi3te
þis is þt lond þt he wole 3ut : ar þe wordles ende .
His deruelynges an+erþe 3yue : & hider hi scholleþ wende .
þis lond is half in þis side : as 3e seþ wel wide .
& bi3onde þe water þe haluendel: as bi þe oþer side .
þt water ne mowe 3e passe no3t : þter del to se
& her <exp>h</exp> 3e habbeþ alle 3er meteles ibe .
þt 3e ne ete ne dronke no3t : ne slepte no3t wiþ our eie .
Ne chele ne hete ne fredde 3e no3t : ne no ny3t 3e ne seie .
Vor þis godes priue stude : & þoru him is þis li3t .
þeruore it worþ euer her day : & neuer ny3t .
3if mon a3en godes heste : nadde noþing mysdo .
Her jnne he hadde 3ut bileued : & is ofsprung also .
3e ne mowe her no+leng bileue : a3en 3e mote far~ .
þei it þenche 3ou lute wule : 3e habbe ibe her 3ar~ .
So þt he bro3te ous in our scip : & wel uair~ is leue nom .
& þo we wer~ hamward in þe se : we nuste war he bicom .
A3enward he wende a3en our wille : it our of þo3te sore jnou3 .
A3en to þis oþer monekes : þis scip we euene drou .
þis monekes ourne a3en ous : þo hi my3te ous ise .
& sori wer~ & wro3 jnou : þt we hadde so longe ibe .
We sede þt we hadde ibe : with gret joie & feste .
Byuore þe 3ates of parays : jn þe lond of biheste .
<fol. 72b>þt our suete lord haþ bihote : hem þt he loueþ her
þer is day & neuer ny3t : & þe leme euer cler .
Certes queþe þis monekes : wel we mowe ise .
Bi þe suote smul of 3ou : þer 3e habbeþ ibe .
þo S . brendan ihurde þis : jn þo3te he stod wel stille .
He þo3te fondi more her of : 3if it wer~ godes wille .
He wende among is monekes : & twelf out he nom .
þt he truste mest to of alle : wen eny neode com .
þis twelf ue he clupe in conseil : & in priuete hem sede .
jc þenche do a+priue þing : þer of 3e mote me rede .
To seche þt lond of biheste : 3if god wolde ous þuder lede .
Seggeþ wat 3our conseil is : to do so gret a+dede .
Leue fader þe oþer sede : our wille we habbeþ vorsake .
Our frend & al our oþer good : & clanliche to þe itake ;
& wen our dede is on þe : 3if þu wolt þt it be .
We scholle vawe wiþ þe wende : our lordes grace to se .
So þt hi uaste fourti dawes : & gret penauce dude also .
& bede 3erne our lordes grace : þulke viage to do .
Hi let hem make a+strong scip : & aboue it al bicaste .
Wiþ bole huden strong jnou3 ; & nailede þer+to vaste .
& seþþe ipiched al aboute : þt þe water jn ne come .
Hi wende to hor breþeren : & wel vair~ hor leue nome .
& seþþe in our~ lordes name : to scipe hi wende anon .
Hor breþeren þt bihynde wer~ : sori wer~ echon .
& þo hi wer~ 3ut in þe scip : after þer come two .
& bed hem vaste þt hi moste : þen wei wiþ hem go .
3e mowe wel . S . brendan sede : ac or oþer schal ate ende .
Repenti ar he come a3en : & al quic to helle wende
vorþ him wende þis holi mon : wuder our lord him sende .
& þis twei monekes þt come last : also wiþ hem wende .
jn þe grete se of occean : vorþ hi rewe vaste
& truste al to our lordes grace : & noþing nere agaste
þe wynd drof hor scip al after wille : þe wynd was good jnou3 .
As þe wynd hem drof wel euene : norþ west hor scip drou3 .
Euene a3en þt þe sonne arist : mydsomeres day .
Non nuste of hem war he was : ne no lond ne say .
Euene est fourti dawes : þe wynd hem drof vaste .
So þt hi seie in þe norþ side : a+gret jle ate laste
Of harde roche & gret jnou3 : aboue þe se wel hei<exp>e</exp> .
þre dawes hi wende þer aboute : ar hi mi3te come þer ney .
<fol. 73r>A lute hauene hi founde : a lond hi wende þer~ .
Hi wende aboute as mopis+men : þt nuste war hi wer~ .
þer com gon a wel vair hound : as it wer~ hem to ler~
At . S . brendans vet he vel adoun : & made hem vair~ cher~
Beu freres quaþ . S . brendan : 3e ne dorre noþing drede
jchot þis is a+messager : þen ri3te wei ous to lede .
þis hound ladde þis holi mon : to an halle vair jnou3
Gret & starc & swiþe noble : wel euene jn he drou3
þe monekes founde in þis halle : bord & cloþ isprad .
& bred & fisc þer up jnou3 : þer nas non þt nas glad
Hi sete adoun & ete vaste : vor hem luste wel þerto
Beddes hi seie 3ar~ ymad : ar hor soper wer~ ido .
After soper to bedde hi wende : to reste hem as þe wise
þo hi hadde alle islept jnou3 : sone hi gonne arise .
& wende a3en to hor scip : as hi hadde er ibe .
& jn þe se wel longe hi wer~ : ar hi mi3te eny lond ise .
þo seie hi bi þe oþer side : an ile vair jnou3 .
Grene & wiþ a+wel vair lese : þuderwar hor scep drou3 .
þo hi come in to þisse vair~ londe : & bihulde aboute wide .
þe vairest scip þt mi3te be : hi seie in ech side .
A scep was grettore þen an oxe : & wittore ne mi3te be .
Gret joie hi hadde in hor herte : þis vair~ scep to se .
þo com þer go a wel vair man : & grete hem wiþ vaire cher~ .
& sede 3e beþ her icome : as 3e neuer er nere
þis is icluped þe lond of scep : vor scep wel vair~ her beþ .
Muchele & wite & grete jnou3 : as 3e al day iseþ .
Vairore hi beþ þen 3our~ scep : & grettore vn iliche .
Vor muri weder her is jnou3 : & lese good & riche .
Her nys neuer wynter non : ne non hei ifounde
Ac hi eteþ þe erbes also nywe : as hi springeþ of þe gronde
Me ne gadereþ noþing of hor mylc : þt hi scholde þe worse be .
Vor þis þing & mony oþer : þe bet hi mowe iþe .
To a+stude 3e scholleþ henne wende : þoru our lor<exp>g</exp>des grace
þt is foulen parais : a wel joyuol place .
þer 3e sculle þis ester be : & witsontid also .
Wendeþ vorþ a godes name : þt þis viage wer~ ido .
. S . brendan & is breþeren : to scipe wende anon .
& rewe uorþ in þe se : in tempest monyon .
So þt hi seie bi þe one side : an ile gret jnou3 .
Hor scip þoru our lordes grace : þuderward euene drou3 .
<fol. 73v>þo hi come almest þerto : up roches it gan ride .
þt it ne mi3te to þe ile come : ac bileuede biside .
þis monekes wode up to þis ile : ac . S . brendan no3t .
þis monekes gonne make hor mete : of þt hi hadde ibro3t .
Hi made hem fisc fur & 3ode hem fisc : in a caudron vaste .
Ar þis visc wer~ isode jnou3 : hi wer~ somdel agaste .
Vor þis fur was þoruhot : þe ile quakede anon .
& wiþ gret eir hupte al up : þis monekes dradde echon .
& þe wei toward hor schip : ech afterer nom .
God leuest hem þo3te he was : þt sonest þuder com .


<Tranche 2>

<fol. 209r>þt we beþ alle kunde hext : wiþþoute god one .
& in heuene also him next : among his angeles echone .
& alle þt nouþe late come : seþþe our louerd ali3te .
& our~ flesch haþ her jnome : ihered beo is mi3te .
þulke þt bifore ous come : wen hi þen deþ founde .
þenne hi wer~ anon icast : jn-to helle gronde .
Ner~ hi so holi ne so good : þer nas vorbore non .
þerfore hem longede more : after our lord echon .
þe prophetes þt wer~ so gode : & so holi alle .
þt if our~ lord vnderstode : wat it scholde bifalle .
Hi wusten þt he wolde come : ac hi nuste wanne .
þe tyme hem þo3te longe jnou3 : ech vnche hem þo3te a sponne
Hi gradden after him wel ofte : jn her~ prophecie
& jn þe bokes þt hi write : þt he scholde hie
God 3eue quaþ on of hem : þt heuene borste a+two .
þt he mi3te li3te adoun : to sauy ous so .
Somdel hem longede þo : wen hi nolde abide .
þt heuene cloue ofte a+two : to sauy eiþer side .
Ac he scholde al-to-berste : & our~ lord falle adoun .
Ac he h<exp>e</exp>iede no3t so bliue : he com softe al isoun
Mi3te hi him habbe ihent : faste bi þe croune
Hi him wolde narwe habbe iwent : ac he hem huld þer doune
Parde 3ut ne com he no3t : nere hem no so wo .
Hi þe grond of helle so3te : ar he com hem to .
S. dauid after his anuy : after him he gradde þus
Louerd in heuene to ous abowe : & li3te to ous .
Scewe ous of þin holi face : & we worþeþ hol anon .
Him longede ek after is face : þe holi symeon .
& alle blisse him was bynome : & ofte gradde bifore .
Louerd wanne woltou come : wenne woltou be ibore .
Wene 3e ic mowe dur~ : wene 3e ic mowe ise .
Her~ mone was deol to ihur~ : ne gamede hem no gle
Ac he ne mened hem no3t : a3en oþer bifore
Vor he nas no3t to deþe ibro3t : ar god wer~ ibore .
Ac he lyuede vorte he him isei<exp>e</exp> : & in armes nom<exp>e</exp> .
þo he a+candelmasse dai : to þe temple com
Louerd wel may ous beo : bet þen hem mi3te þo .
þt mi3te nowar fleo : ac to helle scholde go .
þer our~ lord sede : þo he was ibore .
þt we mi3te beo wel glad : ouerer þt wer~ bifore .
þe prophetes wilnede uorte se : & mony kynges also .
þt we iseeþ 3if it mi3te be : ac hi ne mi3te no3t do .
We mowe nou as it wer~ : for no3t to heuene come .
Seþþe our lord ous haþ ibo3t : & þe deueles power bynome .
Ac hi þt such grace nadde : þt to-fore ous come .
After our~ lord hi gradde : jn prophecie ilome .
After him hi gradde : wiþ grete wille & longe .
No mendement hi ne seie : bote þe pine stronge .
So longe þt hi weri wer~ : & lete al beo stille .
& her~ aredinge forber~ : & turnde to godes wille .
Vor hi ne seie non oþer won : as ose seieþ uor sore .
Vch~ of hem to reste drou3 : & ne speke of him nammore .
þt swete bern our kunde : boþe of flesch & felle .
Of þe kunde of wan we come : somwat ic mot telle .
A good mon þt me clupede isacar : was bi olde dawe .
jn bedlehem þt do3tren hadde two : jn þe olde lawe .
þt on was s. anne : þt ber our leuedi marie .
þter elizabethes moder : þt het jsmarie .
Elisabhet bar of hir~ : S . jon þe baptist .
& marie anne do3ter : bar our lord ihesu crist .
A good mon þer was jn galilee : me clepede ioachym .
Scephurde he was & holi mon : gode grace was wiþ him .
þo he was of twenti 3er : S . anne he nom to wyue .
þer nas couple jn ierusalem : of so clene lyue .
Boþe hi doutede our~ lord : hi delde her~ good aþre .
Vche 3er al þt hi hadde : þt ech man mi3te ise .
þt o+del hi 3eue to þe temple : to hem þt seruede þer jnne .
As we 3eueþ our~ teþinge : of þt we mowe awynne .
þter del hi 3eue to pouere men : & weiueringe also .
Hem silue hi lyuede bi þe þridde : godes seruise to do .
þer ner~ none men jn ierusalem : þt so muche good hadde .
As ioachim & his wif : vor triwenesse þt hi ladde .
Vor hose doþ wel his teþinge : nouþe & eke þo .
His good wole þe betere wexe : nouþe & euer mo .
joachim & anne is wif : to gader~ hor lif ladde .
jn clene spoushod twenti 3er : & no child hi nadde .
Aschamed þer of hi wer~ sore : for hem þo3te þt hi wer~ .
Vor3ete of god to-fore alle oþer : vor no child hi ne ber~ .
<fol. 210r>Hi bihete god 3if þt he wolde : eny child hem sende .
To godes seruice oblege hi wolde : þt child wiþþouten ende .
Vche 3er also ioachim : to þe temple wende .
þre siþe to stable his biheste : 3if god him eny sende .
& offrede largelich~ : of þing þt he hadde .
For schame & for sorynesse : þt hi no child nadde .
þo hi hadde twenti 3er : hor lif ilad so .
joachim offrede to þe temple : as he was iwoned to do .
þe prest þt þe temple wuste : pulte him abac anon .
& sede þt he werþi nas : among gode+men to gon .
& our~ lord him scewede wel : wen he ne þolede no3t .
þt eny child as of oþer men : wer~ of him ibro3t .
joachim was so sore of-schamed : þt he wende out anon .
For schame among oþer men : jn þe temple he nolde gon .
Wiþ is scip he wende in-to anoþer lond : wepinge wel sore .
He ne þo3te to þe temple come : ne to anne is wif nammore .
Wiþ scephurdes þer he was : jn sorwe monþes fiue .
He ne hurde no3t of is frendes : ne of anne is wyue .
An angel com adoun to him : & bad him be wel bliþe .
& sede our lord him wolde sende : þt he wilnede ofte siþe .
þt anne scholde a do3ter ber~ : & of him be bi3ite .
To blisse of al þe world : as þe prophetes hadde iwrite .
jn toknynge he bad him go hom : 3if he ileue nolde .
At þe guldene 3ate his wif : he mete scholde .
joachim ne leuede it no3t : uor longe childles hi wer~ .
Ac hamward he wende naþeles : he no dorste elles for fer~ .
Greot deol made his wif vor him : no womman mi3te more .
As heo was in morninge adai : wepinge wel sore .
& gan to wringe hir~ honde : swete lord heo sede .
Ech~ þing þu 3euest joie : & ech~ þing of blede .
Me one þu makes joie-les : j+ne seo non oþer so .
Me wondreþ 3if ic dorste segge : wi þu þenchest<exp>e</exp> so do .
Wen þu children hast me bynome : & me eke hast bynome .
Myn hosebonde þt is my joie : j+not war he is bicome .
þo com þus an angel to hir~ : doute þe no3t he sede .
jch+am þe angel þt habbe ibore : bifore god þi godhede .
A dou3ter þu schalt her ber~ : al bi godes rede .
Marie schal hir~ name beo: þt holi lif schal lede ;
Of hir~ schal wondri al þe world : & þoru hir~ isaued beo .
þt child þu schalt bityme ber~ : & þt soþe iseo .
A3en þin hosebonde þu go : to voluelle þi bone .
Ate guldene 3ate þu schalt him mete : ne come þu so sone .
Anne ne leuede no3t þis : ac naþeles uorþ heo wende .
Vorte jmete hir~ hosebonde : as þe angel hir~ kende .
joachim & anne is wif : sone to-gader~ hem mette .
Ate guldene 3ate wiþ grete joie : as þe angel hem sette .
Hi clupte & custe wiþ joie jnou : þe bet hi leuede þo .
Vor hope of þis holi child : hamward hi gonne go .
Anne seþþe wiþ childe was : & seþþe wiþ ri3te kunde .
Bar þt swete holi bern : þt euer worþ jn munde .
Marie þt ous haþ isaued : þt erore wer~ ilore .
þe ei3teþe dai of septembre : þt swete child was ibore .
jn ierusalem heo was ibore : jn hir~ fader houde iwis .
Biside þe 3ate of iosaphat : þt nouþe an abbei is .
jn honourance of . S . anne : of blake nonnerie .
jn þe stude þer heo was bore þe swete maide marie .
Holi chirch~ nuste no3t : wuch dai heo was ibore .
Ar nou late þoru myracle : þt god dude þeruore .
A good mon nou late ech~ 3er : gret joie in heuene isay .
Fram 3er~ to 3er~ jn septembre : as falleþ our leuedi day .
Our lord he bad ententiflich~ : sum tokene him sende þere .
Wi more joie were jn heuene þo : þen iner time were .