<County: Gloucestershire>
<Code: L7180>
<MS reference: London, BL Cotton Cleopatra D.ix>
<Text: South English Legendary>


<fol. 153va>Alle þt beoþ in sinne ibounde
And þencheþ godes merci to abide
Lustneþ & herkneþ on stounde
Hou sinne on eorþe spredeþ wide
Bote for non sinne þt man mai do
Jn wanhope loke þt no+man falle
Of alle sinnes is bote þerto
Þei3 on man hadde idon hem alle
Þei3 on man hadde as ic 3ou telle
Jdon alle þe sinnes under sonne
His soule fram þe pine of helle
He mai saue 3if he conne
Schriue him clene & beo sorie
And do penaunce þt him is tau3t
As dude þe pope Gregorie
Þt þe fende him hadde wel nei3 icau3t
<fol. 153vb>Jn sinne his lif he bigan
And dude hit ofte time & lome
And suþþe he was an holi man
And was imad pope of Rome
3if 3e wolleþ a while dwelle
And understond mi tale wel
Of his lif ichulle 3ou rede
Hou wonderliche hit bifel .
Þer was an eorl in aqitayne
Þt mani man stod of eye
And hadde a wif þt het edayne
Bitwene hem com children tueye
A knaue child as 3e mowe heore
Þt suþþe leouede þe fendes red
And a dou3ter leof & dere
Þt wiþ hire was hire moder ded
Þe leuedi was on eorþe ibrou3t
Þo deþ hire hadde idriue to grounde
<fol. 154ra>And þer-after liuede nou3t
Hire lorde bote a+lutel stounde
Ac er he deide he was biþou3t
Of his dou3ter þt faire maide
His sone bifore him was ibrou3t
And þeos wordes to him he saide
Sone ne þertou noþinge wepe
Þei3 ic deie & fram þe falle
Jchulle leue inou3 þe to kepe
Min londes & rentes alle
whan þu schalt alle min londes haue .
And welden al min eritage
whan icham under grete graue
Do þu þin soster non outrage
Þan seide his sone þer he stod
Sore he wepe & mi3te no3t blinne
Fader we beoþ of on blod
Oure loue schal neuere parti atwinne
Nou þu hauest me bisou3t
Þt y ne schal don hire non outrage
Fader for hire cary þu nou3t
Riche schal beo hire mariage
Þis eorl mi3te no+lengore liue
Deþ huppede uppon him faste
He was ihouseled & ischriue
And son deide ate laste
Whan he was ded þt gode kni3t
Þo halpe hit nou3t for+to wepe
Þan was þt maide bri3t
Hire broþer itake for+to kepe .
At eche time whan he was glad .
He cloþed his soster in þt cloþ
He þou3t what his fader bad
3eo was him leof & noþinge loþ
Jn a chambre hi leie ifere
Loþ hem was to parti atwinne
And þt is ruþe of to here
Þe fende tempted hem wiþ sinne .
He lai stille & slepe nou3t
Jn cloþes riche al bihed
<fol. 154rb>Þe feond pult hit in his þou3t
To gon to his soster bed
Hire bodi ne mi3te 3eo fram him wite <mrg>. b .</mrg>
Bote let him al his wille do
And þo was Gregorie bi3ite
His soster þo he com hire to <mrg>. a .</mrg>
Þe leuedi bigan for+to grete
As wimmen doþ nei3 her time
And hire murþes for+to lete
Þt ruþe hit is þer-of to rime
And seide alas & waylaway
Þt ich euere was womman ibore
To sorwe is iturnde nou al mi play
Alas mi soule is nou forlore
Hire broþer hire herde siche sore
And seide soster beo nou stille
Gode soster wepe þu na+more
Þu makest min hert for+to grille
Broþer 3eo seide so god me rede
Jc mai wepe ay & oo
we habbeþ ido a sori dede
Þu art ilore & ic also
Þis dede ic rede þt we hide
Certes oþer we beon ischende
Godes merci we moten abide
Of þe fendes combremente
Quaþ hire broþer care þu nou3t
Soster ic hopie wel to spede
For soþ icham redi biþou3t
Jchot a kni3t schal bete oure nede
Broþer seide þe leuedi þo
Let sende after him anon
Þt noman iwite bote we two
whar-for men scholle after him gon .
3if men witen of oure care
Jn fer lond & hit beo isprad
Certes broþer y schal forfare
woˆ[r]rþe ic neuere þer after glad
Soster quaþ hire broþer þo
For him þt haueþ ous dere abou3t
<fol. 154va>Er þu bringe me in more wo
Let soche sorwe out of þi þou3t
And ichulle sende after þe kni3t
Þt schal oure consail hele
And þoru3 þe uertu of godes mi3t
Al oure wo schal turne to wele
A messager þen morwe forþ hi sende
Þt noman hit wuste bote hi tuo
And to þe kni3t anon he wende
Þt scholde hem helpe out of þt wo
Anon so his kni3t hit herde
Þt his lord after him sent
He leop to hors & forþ he ferde
To don his lordes comaundement
Anon as þe kni3t was icome
Þe eorl in hert was wel glad
Bi þe hond þe kni3t was ynome .
And to a chambre forþ ilad
Jn to þe chambre þo he was brou3t
And þe eorles soster also
Hi tolde þe kni3t al her þou3t
Hou hi were ibrou3te in wo
Seide þe kni3t so god me fede
while þt ich mai ride & go
Jchulle 3ou helpe at þis nede
For+to bringe 3ou oute of wo
Boþe in wo ˆ [&] in wele
Jchulle 3ou helpe al þt ic mai
And al 3oure consail wole hele
Boþe bi ni3t & bi day
Þe eorl seide 3eo greteþ faste
Of sclaundre sore icham adrad
3if 3eo dwelleþ here ate laste
Þe sclaundre wole beo wide isprad .
Sire quaþ he care þu nou3t
And þou wolle do after me
To mi court 3eo schal beo ibrou3t .
And þer 3eo schal deliuered be .
And ic rede þt þou take
Þe wey to þe court of Rome
<fol. 154vb>And ichulle hire loke for þin sake
Trewliche al forte þu come
For drede of deþ er þu wende
Make þi sosteres stat so stronge
Þt noman to hire liues ende
Beode hire non manere wronge
Þe eorl grauntede him his bon
Of þt he hadde him bisou3t
Alle his grete consail son
Bifore him þo hi were ibrou3t
Her consail was son itake
Hi comen ful redi to his hond
And gode chartres he let make
And sesede his soster wiþ his lond
Þe eorl bitoke his soster þe kni3t
Þt trewe was of tonge & tale
To kepe þt leuedi faire & bri3t
Til 3eo were bet of hire bale
Þe kni3t þt leuedi under-nom
And ladde hire forþ wiþ moche <binding>
And to his owne court he com
And brou3te hire priueliche in his <binding>
Þo þe leuedi was ali3te
And in to chambre was ibrou3t
To his wif went þt kni3te
Lengore wolde he abide nou3t
And seide dame bi þi lif
For non þinge þt mai be
Þt þu ne segge maide ne wif
Of þinge þt ichulle telle þe
Dame þe leuedi þt here is
For soþe dame hit is non oþer
Hit is þe eorles dou3ter iwis
And is with child bi hire broþer
Sire quaþ þe leuedi þo
Swete leuedi hire unbinde
For me schal iwite namo
Bi him þt mad leof on linde
Þo hit time come non lette þer nas
Þt 3eo scholde deliuerede beo
<fol. 155ra>Of a knaue ideliuerede 3eo was
Þe leuedi þt was bri3t on bleo
Þe storie bereþ witnesse a-ri3t
who so takeþ þer-of gome
Suþþe þe child was mad kni3t
And þer-after he was pope of Rome
Þe leuedi seide wiþ milde chere
Me þenkeþ min hert wole to-breke
3if þe child is bi me here
Mani on wole þer-of speke
Bote 3e do as ic 3ou telle
Hasteliche wiþoute delai
A-liue ne mai ic longe dwelle
Jc deie attan haste dai
Carpenteres 3e schollen take
Loke þt 3e ne faille nouzt
And a tonne let hem make
Hasteliche þt hit beon wrou3t
Loke þt hit beo anon idi3t
Þt þe tonne beo stronge & god
And in bote aboute midni3t
Hit schal beon ipult in þe flod
3if iesu crist is ipaide þer-one
Þt hit was bi3ite & ibore
He wot wel what is to done
He wolle nou3t soffre þt hit be lore
And 3if hit were a3en his wille
er ibore oþer bi3ite
And in þe see let hit spille
Þer schal no+man hit iwite
Þe kni3t sei3 þe leuedies wille
And seide madame hit schal be do .
Anon he wende forþ wel stille
And hiede carpenteres faste þerto
As mani as mi3te wurche þeron
To make þe tonne hi were ibrou3t .
Hi wuste what hi hadden to don
Anon hit was þer iwrou3t
Þo þe tonne was imad al preste
Þe leuedi for hire child was wo .
<fol. 155rb>3eo mad þe croi3 uppon his breste
And seide alas me is wo bigo
Þe furst child þt ich haue ibore
Nou schal ic hit neuere more iseo
And mi soule þerfore beo lore
Nou swete iesu mi soker~ þu beo
Þo 3eo hadde hit 3eue ones souke
3eo mad þe croi3 uppon his brest
Forte hit saue fram þe pouke
Þo hit was in þe cradel fest
3eo toke a somme of seluer & golde
And leide hit under þe cradel heued
For som man scholde hit biholde
And helpe þt hit were nou3t ded
A peire tables anon 3eo toke
Of yuorie þt hire leie bifore
3eo wrot & in non oþer boke
Hou þt child geten & ibore
And bad on lond whar hit com
A-liue 3if hit were ibrou3t
Men scholde hit 3eue cristendom
For his loue þt alle haþ iwrou3t
3eo leide þe tables under his hed
Of yuorie þt were iwrou3t
And anon þe leuedi bed
To watere þt hit were ibrou3t
To þe bote hit was ibore
And ipult in þe salte flod
Þe moder was sori þerfore
And ful dreri in hire mod
Þe eorl hire broþer he was gon
For sorwe ofte he siked sore
And lai adoun sike anon
Ne aros he neuere þer-after more
Sori he was for his sinne
Þt he wiþ his soster dude
And for hi scholde parti atwinne
Ros he neuere up of þe stude
Þe leuedi to churche was igon
Jn child bedde as 3eo lai
<fol. 155va>Þer com a messager anon
Ri3t wiþinne þen þridde dai
And tolde þt hire broþer was ded
Erliche in a someres morwe
Þt was to hire a wel colde red
Þo was hire bodi fulle of sorwe
Þan seide þe kni3t þt was trewe
Conforte þe dame for charite
Hit nis ˆ <mrg>non</mrg> bote his deþ to rewe
For as god wole hit schal be
Dame þu schalt þe make 3are
And let sorwe out of þi þou3t
And to his buringe þu schalt fare
Er he beo to eorþe ibrou3t
Þo was þe leuedi idi3t al boune
Þt was boþe gode & hende
And isette uppon a stede broune
To hire broþer forto wende
wiþ sorweful hert & dreri mod
Toward þe burienge forþ 3eo rode
Þoru3out hire eyen ronne ablod
Þt neuere a ter oþer abode
Þo 3eo com in to þe halle
Hire songe was wope & weilaway .
3eo fel adoun amonge hem alle
vppon þe bodi þer hit lai
For sorwe þer 3eo swowened þrie
And amonge alle þt þer were
Hi wend alle 3eo wolde deie
Hi nom & ladde hire fram þe bere
Þo þe eorl was burede an under molde
No+man dude hire non outrage
As ri3t was þt 3eo scholde
3eo entrede in to þe eritage
Þo was hit pupled & nou3t ihud
Þt al þe eorldom was hire owe
For clene maide 3eo was ikud
Boþe wiþ heye & ek wiþ lowe
Þe leuedi liuede wiþ worldes winne
Dai & oþer & 3eres fele
<fol. 155vb>And was sori for hire sinne
And partede of hire worldes wele
To pore men þt hadde nede
3eo 3af boþe mete & cloþ
Of hire godes 3eo nas nou3t gned<?>
To weorne þe pore hire was loþ
Þer was a duke of moche mi3te
And in his hert he hit fond
Forto wedde þt beord bri3t
Þt was so riche womman of lond
He sende þider kni3t & sweyn
Forto wite what was hire þou3t
And 3eo him sende word a3eyn
Þt 3eo wolde him habbe nou3t
Þo þt he hurde of hire answere
Þt þe leuedi him hadde forsake
He gadrede ost wiþ schelde & spere
Þo bigan werre forto awake
Bote he mi3te þe leuedi winne
He þou3t to schende al hire lond
werre he þou3t forto biginne
And ate laste inou3 he fond
Þan seide þt beord bri3t
Þo werre bigan forte awake
To þe gode trewe kni3t
Þt hire broþer hire hadde itake
Þe duke schal neuere mi bodi welde
Bote hit beo wiþ strenþe wonne
Er mi sone beon of elde
Þt was istopped in þe tonne
3if he haþ lif iwonne
Þoru3 helpe of him þt al haþ wrou3t
Þis werre þt is nou bigonne
He mai helpe to bringe to nou3t
Þo þe grete lordes of hire lond
Þo hi wuste wharto hit drou3
And comen al redi to hire hond
And founde þe duke werre inou3
Let we nou þt leuedi freo
werre wiþ þe duke a+stonde