<County: Herefordshire>
<Code: L7430>
<MS reference: London, BL Cotton Cleopatra D.ix, hand of fols 156r-167>
<Text: South English Legendary>


<fol. 156ra>þe lady lette we stille beo
how þt litel child was founde
hende in halle herkneþ me
I chote he sanke not to grounde
þt god wole al schal saued be
Ri3t as his moder him had iwounde
þe wynde hym drof in to þe se
In þt tonne wel y-bounde
Twey fisscheris þer weren ywent
þt breþeren were boþe jch wene
Out of an abbey were jsent
wiþ nettes & wiþ hokis kene
To take fissches to þe couent
þe monkes for hij wolden queme
þt ny3t nas hem no grace ylent
wiþ li3t leome sprange þe day
hij seien a bat come walwynge
þe litel child þer-inne lay
þe fisscheris wenten good to fynge
And wenten þider þe ri3t way
And fast drowen hem to lond
wt ores good ymade of tre
þe stormys dryue hem to strond
Adreynt wenten hij to be
þe tonne token hij on honde
And bar~ her~ of þe salt see
þe abbot come þer~ on þe londe
his fisschers 3if he my3t yse
As god hym hadde þider ysent
þt þe child schold ysaued be
Ri3t to þe abbot he was ylent
þe tonne þt was maad of tre
þer-on was his ey3e ywente
Anoon seide þe abbot fre
how was þis bot ysent
And what þynge may þer ynne be
þis fisscheris seieþ boþe yliche
And þe abbot answeriþ sone
By þe kynge of heuene riche
Sum þynge is þer-ynne ydone
<fol. 156rb>þt child bigan for to scryche
wt steuene as hit wer~ a grome
þe fisscheris wenden bisiliche
hij nusten what hij my3tten done
þe abbot bad wiþ oute wou
þe tonne vndo þt he þar~ say
þe fisscheris redy wer~ ynow
his wille hij duden al þt day
Acloþ of selk þe abbot drowe
Of þe chyld þt in þe cradel lay
þo lay þt child alyte hit lowe
vpon þe abbot wiþ ey3en gray
þe abbot huld vp his honde
wiþ hert good to god ywente
And sayde yblessed be þy sonde
My lord þt þou me hast ysent
Of yuory þe tablys longe
þe abbot fond þer-in present
he toke hem in his hond
& byhuld what þer was writen & dempt
þe abbot bad þe fisscheris boþe
Ten mark of þe cradel take
þt hij ne scholden no3t be wroþe
Ne sory for þe childes sake
I wote hij stoupeden a-doun boþe
þat tresour~ hij gunne to hem take
þo weren hij alto-geder~ yknowe
how hij founden þt lutel knape
þat o fisscher~ was riche of wele
And hadde halle & bour~ of stoon
þter hadde children fele
Pore he was good hadde he noon
þe abbot him 3af wiþ him to ber~
þe ten mark whanne he wolde hom goon
her~ consayl þt hij scholden heele
Al vnder fote as stille as stoon
þe riche man þer he bitau3te
For to keke wel þt gome
þt he ne sscholde for none au3te
Telle how ham was bicome
<fol. 156va>Bote say þi dou3ter~ in þt ny3t
Sente þe þat lutel sone
And preyde þu sscholdest wt þi my3t
Take hit cristendome
he toke þat child wyþoute hete
And wente hym home þe ri3t gate
A womman soon he haþ ygete
To beren hit cristendom to take
whanne þe couent hadde y-eete
þe fischer nolde his ernde late
wiþ þe abbot he wolde speke
And mette him ri3t at þe 3ate
þe abbot wist þer of ynow
his comynge nas hym noþing loþ
þe fisscher forþ wel soon drow
þe child wiþ þe crisme cloþe
And seide my dou3ter sent hit ou
To cristne wiþ-outen ooþ
þo stood þe abbot stille & lou
And seide wt hym to church he goþ
þe abbot me clepid gregorye
his name þer þt child he toke
And monkes many stondeþ by
wiþ candel li3t holdeþ þe book
þo was he wiþ clerkis slye
Jfolued in þat holy flood
þrou3 god þat semly si3t an hye
þt sched for vs his hert blode
þe abbot was þat child hoolde
þe cloþ of selke he toke to hoolde
And þe four~ marke of þe golde
þe tables þat ic of eror~ tolde
þe lutel childe was myld of mode
In cloþes hij gonne hym faste holde
þe fisscher þt was trewe and gode
þe childe he toke to loke & holde
whanne he was come to 3eris fyue
wel hende he was þt childe to loke
þe abbot spedde him swyþe blyue
þt child sette to þe boke
<fol. 156vb>and hym lerede fast and swyþe
Ich þe wol helpe to hond & fote
3e þat wolleþ þis story lyþe
wiþ wille hereþ wordes swote
what helpeþ hit longe drawe
Grogorye can ful wel his pars
he can ful muche also of lawe
And muchel vnderstonde of ars
he wende in a+day to plawe
þe children ournen at þe bars
A+cours he toke wt o felawe
Gregorie þe swifter~ was
After hym he leop pas wel gode
wiþ honden seyseþ him wt skept
þter was vnbliþe of mode
For tene of herte sore he wept
And ran home as he wer~ wode
wt grim crye and loude grette
And told his moder þer he stode
how þt gregorie him bette
womman is a wonder þynge
heo can none hertes wille lete
wt-oute more dwellynge
gon heo . greg~ . to þrete
Sey þu traytour~ and fyndlyng
whi hastou my sone ybete
In alle þis lond is noon libbyng
þt woot wher~ þu wer~ ygete
Gregorie stood as stille as a stoon
wt herte sore þt wey home he nome
Oþer~ word seiþ he noon
Forte he bifore þe abbot come
wt herte sore he made his mone
þo seide þe abbot for him aboue
whi artou come þus sory home
who haþ þe seide oute bot loue
þo seide þt child in al þynge
þe fisscheris wif my moder~ ic wend
Clepiþ me traitour~ & fyndlyng
And seiþ j nas noute of her~ kende
<fol. 157ra>lord þt art of alle þynge
þou sende me grace & þider~ sende
My self to þat wonyinge
þer ich was boren and sschal an ende
þo seide þe abbot holde þe stille
Suche þou3t & wordes let þu be
þu canst wel rede & synge sschille
þer-fore þis hous ic graunte þe <e looks much like o>
þi nedes J schalle so fulfille
wt al þe monkes þt þer be
whan god of me haþ done his wille
Abbo J schal make þe
Nay quaþ he forsoþe sone
þi þou3t is from myn herte ydi3t
Bote 3if þu woldest ou3t for me done
þe armes woldy take of kny3te
To þt myster ich am ful bone
Scheeld to ber~ and brunye bri3t
er ordres kepe j none
while icham þus 3onge & li3t
By hym þt made wynde & water
And leef to spryng on grene tre
Til ic wite who be my fader~
Ne sschal ic neuer~ blyþe be
And who me first bound in my cradel
Forte ic my moder knowe & se
þt forto adrenchen in þe water
Out of þis toune wol ic fle
þe abbot þt child ne my3t lette
Of no biheest of penyes rounde
þe cloþ of selk he leete fette
þt gregorye was yn ywounde
hijs nedes þere he wel bette
he 3af hym kny3thode in o+stounde
þe tables in his honde he sette
And bade hym rede what he þer found
3if þis ˆ [is] soþ þat þus lettres seyn
J fende her~ auentres stronge
Of a child a+lutel þeyn
J not of what lingnage he spronge
<fol. 157rb>þo he hadde þe lettres radde
þt in þe tables weren ywrite
he saide wher~ was þt child bistad
þat in þis tables was ysmyte
And whider~ þt water haþ him iladde
Tel me sir~ 3if 3e wite
þe abbot anone þt childe bad
And seide child by me sitte
And told him ri3tsone anone
In which gates he was founde
þus cloþes of selk þu haddest vpon
My sone þt þou wer~ inne ywounde
And markes of gold many oon
And penyes boþ fair~ and rounde
þis tables of yuorie boon
Jch haue hem loked hool & sounde
Sir~ þe tyme is come to ende
wel iknowe & wide ykud
Al wote boþe sibbe and frende
Jcham a+fyndlynge her~ ikud
To oþer londes wol ich wende
þer my schame may be hore
And seche after myne owne kunde
And wiþ þat he groneþ sore
þe abbot purchaseþ him a+schip
þer monye and feele stondeþ a+rowe
þe kny3t was hende & wise of witte
At his partynge he wepe a+þrowe
þe ropis fast weren y-knyt
þe mast iset þe seyle vp-drowe
þe wynde wel euene was yhit
þt euene & fast gan to blowe .
And drof hym to þt londes side
þt was alle in his moder honde
Gregorie cam al wiþ pruyde
As kny3t comeþ in vncouþ londe
Mon may gon fer & wyde
And muchel iseo & lerne among
Atte last hym schal bityde
Be hit gode oþer stronge
<fol. 157va>whanne gregorie com oute of barge
Jchot he hadde wel good stede
helme brunye and wel good targe
kny3t he semeþ good at nede
þis fel in þe tyme of marche
þt ich 3ou telle se and rede
he toke an jn as a kny3t ful large
At þe portreues hous & þider 3ede
þe portreue sey þat he was hende
þe kny3t wel fair~ he vnderstode
hem þou3t he was of grete kunde
To him he seiþ wel muchel good
Atte þridde day at ende
Askeþ as he sitte at bord
whoder hastou mynte to wende
Arst greg~ . ne spake no word
Bote in a day witen he wolde
3if þer wer~ eny werre stronge
Or eny man þat dorst holde
An vncouþ kny3t of oþer londe
þe hostace sone tolde
werre grete ham wesse among
Oure bestis beþ robbed & solde
Our~ townes brend vnder our~ hond
Greg~ . seide what eyleþ þat
why ne drawe ze to a-cord & loue
3e seyþ þter and sone spak
þer to brynge hit god aboue
A+lady semely þer heo sat
þrou3 hir þis werre is vs bicome
And of a+duke þis stronge hap
þt wold hir haue to wyfe ynome
To-morwe 3if þu wolt for one
þe lady þu my3te in church yse
So trewe in lond note ich noon
Of body chast fair~ and fre
To oure stiward schal J gon
And telle hym þe tale of þe
Reseyued schaltou ben anone
Jchot 3if þou wolt wiþ hir be
<fol. 157vb>Greg~ . was white so mylk
wel fair~ on body to biholde
Jcloþed he was al in selke
And Jgysed in mony folde
And seiþ com forþ 3if þu welt
Ich am redy to church ic wolde
þe ost wote wel of his wille
And geþ among þe burdes bolde
þo hij were to churche ycome
To se þe lady trewe and gode
wel hende was þt louely gome
he grette þe lady þer heo stode
þe lady bihuld him wel sone
As heo lay byfore þe rode
þt cloþ of selk heo knew anone
þt heo 3af her~ sone in to þt flode
þt comelich lady fair~ of hewe
lokeþ on hym wiþ ei3en two
Bote of hym noþynge ne knewe
he hadde be her~ so longe fro
þe cloþes of selk beþ al newe
þt heo him 3af þo hir~ was wo
On hym fast her~ ei3en heo þrewe
þo hir biþou3te þt lady þo
þe lady her~ ˆ [bi] þou3t sone
þt mony a+cloþ is oþer iliche
þerfor heo toke þe lasse gome
To þt kny3tes kunne riche
þe stiward herd sone his bone
Receyued he was curteisliche
þo was þe stronge duk of Rome
Jset aboute þe castel diche
J-pi3t he hadde his pauyloun
Tentes Jtild Jsprad wel wide
Baners ysette & gonfay noun
Aboute þe cite al wiþ pruyde
kny3tes þt schold loke þt toun
To þat castel gonnen ryde
To wite conseil and resoun
3if hij sscholden þe duke a-bide
<fol. 158ra>Greg~ . was man of faire antayle <?>
wise and trewe in vche a+li3t
Schame hit is wiþ-oute faile
To ligge lange in sorewe & griþ
þat habbeþ hauberk stronge of maile
3e sschulen hem were and go þer-wiþ
we sschulen take þe batayle
vp þe duke þt nul no griþ
þe kny3tes on louelich sschroude
hij gon hem arme swiþe wel
þe 3ates stille and nou3t loude
schutten fast of þe castel
Greg~ was a kny3t wel proude
þe dukes folk bihuld vche del
And at a+posterne he went out
wt scharpe spere & swerde of stele
Jchot a stede he bistrood
And toke a sper~ þat was sounde
Byfore al þe ost he rode
þe erþe dunede & alle þe grounde
As he seiþ þat þe storie wrote
he won þt was worþ many a+pound
wt spere & dunt of swerd wel brode
he felde many on in astound
þt folk out of þe castel come
wt launces & wiþ gonfaynoune
þe duk was war~ of hem wel sone
wiþ route grete vnder þe toun
A+litel wi3t after þe none
was iknocked many a crowne
Many a kny3t hadde to done
Ar þe sone drowe a-downe
wel strong hit wer~ me to telle
þt folk þt þer was feld & slawe
J sschold longe her~ dwelle
good is ic reste me a þrawe
Many man þrou3 flessch & felle
was ysmyte to þe mawe
As þu seost water of þe welle
þe blode wt þe hul adoun gan drawe
<fol. 158rb>Greg~ . rode after þe duk
þrou3 þe ost in al his ger~
wt grym voys he gradde aloude
A+launce ichille to þe ber~
þe duk was ˆ [wroþ] wt hert proude
To him he dressed þo his spere
he was bore ouer his horse croupe
þt he grynte as a ber~
þo was þe duke wt streynþe itake
And to þt lady ladde biforne
heo heet men sschold him biwake
Jchab him ated seþþe ic was boren
heo seide he schold neuer~ askape
þe lady bri3t so blosme on brom
Forte he wolde his pees make
Of al þe sschame þt he hir hadde don~
he gon to swere al aloude
To fore hem alle on a boke
þei he were bold prince & proude
þt ransom for his body he toke
So seruede heo þat riche duke
þe destruccion he nou3t forsoke
he swor~ he wold 3elde al quyk
Al þt he þer mys-toke
whan þat ransom was y3eue
þt þer nas no more strife
þo my3te þe lady in pees lyue
Euer more þe dayes of her~ lyfe
And a-wey he wende seþþe
In to his londes wiþ his lif
heo seide a+3efte ic schal þe 3eue
Schaltou neuer me haue to wif
Greg~ was kny3t of muche mond
Ac he was wonderliche pore
Jnto oþer londes wolde he fonde
þer eny grace my3te be more
To wynne wel þe penyes round
Ofte wer~ his sikynges sore
whan he þou3t on þe hard stound
how he was by3ete and bore
<fol. 158va>he seide he wolde fram hem fare
Jn londe of armes more to do
þe contesse þo hadde care
And seide sir~ þu sschalt nou3t so
wiþ hir~ stiward spac heo þare
what mowe we him 3eue & sug3te to
he may not wenden away þus bare
þou wost he wreke vs of our~ fo
her~ stiward answerid her~ wel raþe
Suche a kny3t in lond nys noon
Ichot þi sulfe þu dost skaþe
3if þu lest hym from þe goon
he is trewe so god me saue
Stif and stronge in euery boon
3if þt þou wolt a lord haue
On suche a+kny3t þu my3t wel done
þe consail was 3eue & þe dome
þt he sschold þe lady wedde
To churche wenten hij wel sone
wiþ barons þt þe lady hadde
Al þt me sschal at spousyng doon
þe prest þere in boke radde
As man sschal his wif vnderfon
At hond at bord and at bedde
þo was þe eorl of my3t stronge
Jkud and clepid in aquitayne
And lord iholde in þat lond
þt folk of him were ferly fayne
he loueþ ri3t and no wronge
Manr~dene þt was to sayne
To be boxum to his hond
hij sworen him feute kny3t & swayne
þe riche eorl for-3at hit nou3t
þe sorewe þt him was so old
vpon his tables was his þou3t
þt layen in þe tonne yfold
Al-one to hem he wente ofte
And toke hem þer on to bihold
Markes four~ of gold ywrou3t
he 3af þe portreue al ytolde
<fol. 158vb>after þt he wende sone
As prynce proude in his pride
he þou3t what him was to done
And where his tables my3t hide
To a+chaumbre he wente anone
þt derne was in someres tide
þe tables leide vnder a stone
þt no man sey ne stode bi-syde
þo was his wone oft al-one
In-to þt chaumbre oft to wende
þer-inne most no man come
Ne of his sorwe se none ende
he was a+dryre modir sone
while he þe tables huld in hond
his heer~ þt was fair~ and bone
wiþ fyngres he wold draw rounde
þer nys noon so deorne dede
þt sum stound nul be seyn
þe eorl nold wiþ him lede
To þt chaunbre clerk ne sweyne
A womman toke þer of heede
whanne he wende þer þe tables leyen
Aboue to þt chaumbr~ he 3eede
And out com ofte drery a3eyn
To hontyng on a day he wente
wt-ynne a dale in þat forest
wt houndes þt wer~ li3t & lent
To leten of lece to cacche beste
þat lady bri3t in bour~ was sent
At+ome was wiþ-outen chest
A tyþing þer was harde istent
And þerof wonder hadde heo mest
hou þt her~ ˆ [lord] himself alone
A womman told her~ of þt sawe
Jn a chaumbr~ he wold gone
wiþouten sweyn oþer felawe
þer-inne he made a+drery mone
heo sayde lady trowe my tale
By semblant þt hym is opon
he comeþ þer oute wo & pale
<fol. 159ra>þat lady hadde wonder þo
For deol of hym heo wolde deye
what wolde he in þat chaumbre do
wher~ fore ˆ [haþ] he toun and treye
heo heete her maydenes for to go
Jn erberes for to pley
Jchot þat heo dude also
Out of þe chaumbre hij toke her~ wey
Alone þt lady lefte þer ynne
Nusten hij not what heo munte
þe lady nold neuer~ blynne
þe chaumbr~ dore of hoke heo hente
And sou3te and founde þe tables þeryn
þt wt her~ sone awey wer~ sente
And knew wel þt he was of her~ kynne
þat a+ny3t in her~ armes wente