<County: Worcestershire>
<Code: L7750>
<MS reference: Oxford, Bodleian Library, Laud Misc. 463>
<Text: South English Legendary>


<fol. 115ra><line 9> LEsteneþ alle & herkeneþ me ;
3ong & olde thewe & freo .
And J . 3ou telle sone
hou a 3ong man gent & freo ;
Bigan þe werldes wele to fleo ;
y-bore was in Rome
Jn Rome was a doughty man ;
þat was cleped Eufemyan .
Man of mychel myghte ;
Gold & siluer he hadde . y.nouh ;
halles & boures oxen & plouh .
And wonder wel it dyghte
¶ For all þe seke of þe burhg
Faste wer~ y.sough þoruhg
<brd>& brouht to his house ;</brd>
he let hem bedde wel & fede
and to hem tok goed hede
<brd>him-self & his spouse</brd>
þe man hadde a god wif
she ne louede flyt ne stryf
<brd>Jn al hir~ liue ;</brd>
þe seke+men ofte she fedde .
& softe brou3t hem o+bedde
<brd>blessed beo she to wiue .</brd>
¶ þei wer~ to-geder~ 3eres two .
& so þei wer~ somdel mo
<brd>wt-outen any blede .</brd>
þei bede god wt herte gode
þt hem sende suich a fode
<brd>to serue hem & drede .</brd>
and Jhesu Crist þat is so mylde
3af hem grace she was wt chylde
<brd>þe gode lauedye</brd>
Boþe be day & be nyght
3erne þei þonked our~ dright
<brd>& seinte Marie</brd>
þo þe child y.bore was ;
þei þonked Crist of his grace
<brd>wiþ glad chi[e]re ;</brd>
also as þe wone was
as þei coude wt softe pas
<brd>to chirche þei it bere .</brd>
þo þis child to chirche comm
To afong Cristendomm
<brd>as þe ryght is ;</brd>
his fader & his moder þo
swiþe bliþe wer~ bo
<brd>& cleped it alexijs</brd>
¶ þei nadde bot þilk sone
þerfore as it is þe wone
<brd>þei loued it þe more .</brd>
þo he was old 3eres seuenn .
þei him wissed wt mylde steuenn
<brd>& sette him to lore</brd>
<fol. 115rb>¶ þis child wex & wel they
Cristes help him was ney
<brd>& þt was wel y.sene</brd>
For mor~ he lerned in on 3er
þan any of his oþer fer~
<brd>dide in 3eres tene .</brd>
as sone as he vnderstod
werldes blisse nas not god
<brd>who it vnderstode .</brd>
werldes wele he forsok
& to Jhesu Crist him tok
<brd>þt deyede on þe Rode .</brd>
he besought nyght & day
heuen king þt al wel may
<brd>3eue him strength & myghe</brd>
a3ein þe feond þt is aboute
to bring his soule in gr~t doute
<brd>gostliche to fighte</brd>
¶ his bone herde þe king of heuenn
& spak to him wiþ mylde steuene
<brd>& seide alexijs</brd>
To-day þou may bliþe beo
þi bone J . grante þe
<brd>& a sete in heuenn bliss</brd>
¶ and J . þe do to vnderstonde
þt þou most þole shame & shond
<brd>al for my sake ;</brd>
Jnto vnkouþ lond þu most wende
sone J . wile þe þider sende
<brd>& al þi kin forsake</brd>
Jnto vnkouþ lond þu shalt far~
& suffre myche tene & car~
<brd>& al for loue myn ;</brd>
& sithen þu shalt a3ein come ;
& in þi fader hous wone
<brd>& þer-in haue goed fyn</brd>
¶ þe childes fader fel in elde
& his moder godes helde
<brd>3er~s hadde fele ;</brd>
he wold his sone shold wiue
To glade hem in her~ liue
<brd>& haue werldes wele</brd>
¶ þei sought hem sone a mayde
þt witty was as al folk sayde
<brd>comen of hy kinne ;</brd>
womman she was of heu bright
heo þouht on crist day & nyght
<brd>& kepte hir~ fro sinne .</brd>
þo þei wer~ to-gidere come
þis maide & þis 3ong gomm
<brd>Jn godes lawe ;</brd>
þere was game & myche gleo
ac for-soþe tel J . þe
<brd>eyled him no plawe</brd>
¶ þe day was go . þe nyht was comm
seide þe fader to ˆ [þe] sone
<brd>wiþ glad cher~</brd>
vp arys sone myn
& go into boure þyn
<brd>To glade þi fere</brd>
þo he com to boure to his fere
he beheld þe may of glad cher~
<brd>& of bright hewe ;</brd>
sone menged his þouht
Jn fonding he was brouht
<brd>his car~ began al newe</brd>
he sy3te & made sory chere
þe teres out of his wete ler~
<brd>bitter he let falle</brd>
Ne myht glade him his fere
wt wordes ne wiþ fair cher~
<brd>þt stod shred in palle</brd>
<fol. 115va>No lenger to hele of he brak
þe 3ong+man to his bride spak
<brd>wt wel fair ber~</brd>
Lemman haue goday
No lenger J ne may
<brd>wiþ þe leuen here</brd>
wende J . mot fer of lond
& suffre tene & peines strong
<brd>my sinnes to bete .</brd>
Boþe J . mot for gode+sake
Fader & moder myn forsak
<brd>& þe þt art so suete</brd>
þo she hadde hearde þis tale
al hir~ blis turned to bale
<brd>y.swowe she fel to gronde</brd>
þo she of swounyng ros
atterliche hir~ agros
<brd>wt car~ she was y-.-bound</brd>
¶ sone þo she myht stonde
she tar hir~ heer & wrong hir~ hond
<brd>& made reuful bere</brd>
Nou þu wilt my lef of londe
Loke J . may after þe long
<brd>alas þt J . ded nere</brd>
allas mi lef what hastou þouht
Jn myche car~ þu hast me brouht
<brd>on me þu hast sinne</brd>
after þt þou art gon .
vpbreid me tyt many+on
<brd>of þi riche kinne</brd>
awey mi lef þt J . was bor~
For al my blisse is forlore
<brd>& nou waxeþ my pine</brd>
alone her-inne J . wile wone
& euere eft mannes mone shone
<brd>al for loue þine</brd>
¶ Lemman al for þi sake
so doþ þe turtel for hir~ mak
<brd>whan he is ˆ [.y.]slawe</brd>
Al myrthe J wile forsake
& euere-more sorwe take
<brd>& shone al plawe</brd>
he tok his girdel in his hond
& his mantel þer-wiþ he wond
<brd>& his ring ˆ [of] golde</brd>
Mi lemman haue þis to þe
& oþer while þenk on me
<brd>whan J . lye vnder molde</brd>
¶Gret wel fader & modur myn .
Leue her~-inne & beo her~ hyne
<brd>wt wel milde mode</brd>
þilk lord J . þe beteche
þt is of alle bales leche
<brd>& deþ þoled on þe rode</brd>
Out of bour~ he went anon
as swiþe as he myht gon
<brd>Right to þe stronde</brd>
sone a ship he fond 3are
þat was redy to fare
<brd>Jnto vnkouþ lond</brd>
¶ Jnto þe ship anon ˆ [he] wend
& god suche wind sende
<brd>þt sone to lond hem brought</brd>
þt ship was god þe watur deop
& oþer while sore he wep
<brd>& was in grret þouht</brd>
þo he vp to londe com .
he seld his cloþes euerichonn
<brd>& bou3t him pore wede</brd>
and his gold & his feo
among þe pore delte he
<brd>þt hadde mych neode</brd>
<fol. 115vb>¶ sone he it vndernomm
þt he to [a] borugh com .
<brd>þt mychel was & kete</brd>
sone so he þider comm .
to þe temple þe weye he nomm .
<brd>God selue to grete .</brd>
among þe pore he woned þar~
Jn sorwe & in myche care
<brd>til he fel to elde ;</brd>
Ouht þt he spare myht
Be day & eke be nyht .
<brd>his pore feren he delde .</brd>
þo þe tiþing was . y-comm
To þe fader of þe sone
<brd>hou was a-go .</brd>
him þouht his herte wold to-breke
On word ne myht he speke
<brd>for sorwe ne for wo .</brd>
Ofte he sy3te & grente sore
To tar his her his lockes hore
<brd>þe gode old+man .</brd>
3erne he gradde godes ore
þt he ne moste liue namor~
<brd>to swoune he began .</brd>
¶ his moder wiþ softe pas
went to bedde & gradde allas
<brd>þt she was .y.bore .</brd>
Nolde she neuere eft out com
þer~ she weop for hir~ sone
<brd>þt she hadde lore .</brd>
all þt þer-inne were
hem-self drou3 be þe her~
<brd>& wrong her~ hond</brd>
Besou3te god he shold hem ler~
To what lond he go wer~
<brd>& wher~ he wer~ a-stond</brd>
his fader & his moder bo
For her~ sone wer~ wo
<brd>þt J . ne may of telle .</brd>
For+to seke her~ sone
Jn which lond he wer~ becomm
<brd>Men þei sent snell .</brd>
¶ Jt befel vpon a day
þt þe men nomm her~ wey
<brd>forþ right be þe chirche .</brd>
þere her~ lord nyght & day
among þe pore folk lay
<brd>Cristes will to wirche .</brd>
he knew hem & þei not him
Of her~ goed þei 3euen him
<brd>as it wolde falle .</brd>
he heried god & made him glad
þat he for his loue hadde
<brd>almes of his thralle</brd>
Out of þe bourgh þei went sone
to her~ lord þei come
<brd>wiþ goed spede .</brd>
Tiþinges none þei brouhte
of his sone þt þei soughte
<brd>Jn vnkouþe theode .</brd>
¶ þo þis 3ong+man woned hadd
Jn þe tonn as a pore ladde
<brd>3eres seuentenn</brd>
God wolde his car~ wende
& to his fader hous ˆ [him] send
<brd>to bring him out of teone</brd>
Jt befel in a nyght .
þat þe mone shonn bright
<brd>þe belleward him wend</brd>
þe leme of heuenn he sey aliht
& stonde vpe godes knyght
<brd>þt al þe chirche a-tende</brd>
<fol. 16ra>¶ sone at morwe whan it was day
þat he be þis man say
wide he it tolde
To þe chirche þei gonne teo .
þilk holy man to seo .
Boþe 3ong & olde
¶ þis holy man turned his þought
worshipe of men kepte he nou3t .
þat is frakel atte ende
Out of bourgh he went anon ;
to þe watur he com gon .
þer ouer he moste wende
Jnto þe shipn he went a nyght ;
Elles-whare þei hadde tyght .
Jnto vnkouþe londe
þei went fair~ swiþe ryght ;
& sone at morwe þo it was lyht .
at Rome þei gonne astonde
¶ þo he to londe come ;
Jnto þe tonn he moste rome .
his liflode to wynne
as he went þoruh þe strete ;
his oune fader he gan mete .
as he com fro his inne
þo þe sone his fader mette ;
Mildeliche he him grette .
and bad him som gode ;
þe gode+man sone herd his bone ;
for al his blod gan menge sone .
vpon his oune fode .
¶ 3et spak þis holy man ;
To his fader Eufemyan .
wiþ mylde mode .
þt goed þat þou þenkest do me
Jhesu Crist it 3elde þe .
þat diede on þe Rode
For if it is in þi mod~ ;
þat þou hast any fode .
Jn vnkouþe londe .
Crist .J . beseke par charite ;
þat he wile to him seo .
wher~ he beo astonde
¶ þo he spak of his sone
þe gode+man as it was his wonn
Gan to sike sore
his herte fel cold so stonn ;
þe teres fellen to his tonn .
Ouer his berd hore
<fol. 16rb>¶ To his hous þe pore he broughte
And a 3ong+man him betaughte
<brd>to serue him to quemm</brd>
þere he woned day & nyght
& serued god wiþ al his myht
<brd>3eres 3ette seuentene</brd>
somme þt of þe in were
þe holy+mannes cloþes tere
<brd>þere he lay in his bedde</brd>
Ofte þei drowe be þe her~
& of broht & watur cler
<brd>þei caste in his nebbe</brd>
Ofte þei him bete & buste ;
þat þe lord þer-of niste
<brd>þese wikkede fode</brd>
þei clopeden him waste-bred
& wissheden þat he wer~ ded
<brd>y.wis þei wer~ wode</brd>
¶ al þe shame þat he drey .
þe while he was his fader ney
<brd>he þolede wt mylde mode</brd>
and ofte to god he gan grede
þat he for3af her~ misdede
<brd>& bringe hem to gode</brd>
þe while he was in þe house
eche day he sey his spouse
<brd>his fader & his moder</brd>
ac sone he tornede to þe wowe
þt he nere not y-knowe
<brd>of hem ne of non oþer</brd>
þis holy man þought þo
þat his lif was almest do
<brd>For seknesse þt he hadde</brd>
parchemyn he þer~ wan
& al his lif wrot þer-on
<brd>as he lay on bedde</brd>
¶ also he wrot on his bok
hou he his 3ong wif forsok
<brd>þo he of londe wolde</brd>
hou his mantel he hire betok
and his girdel he forsok
<brd>& his ring of golde</brd>
Jt befel on a sonenday
þat alle men of cristes lay
<brd>to þe chirche come</brd>
Clerkes knyghtes 3ong & olde
þ+emperour wiþ eorles bolde
<brd>þe pope self of Rome</brd>
þo þei þidere come were
to her~ as þei sholde þere
<brd>Godes seruise</brd>
alle þei beden here bede
Be þe lift þei herde grede
<brd>Jn wonder wise</brd>
¶ Comeþ alle now to me
þat sinful haueþ . y.beo
<brd>and afong 3oure meode</brd>
alle þat haueþ þolede pine
For þe loue of me & myne
<brd>J . 3ou wile feode</brd>
Of þis steuene hem þoughte wonder
Many wende it were thonder
<brd>to gronde þei gonne falle</brd>
what þis cry betokne sholde
þat god hem shewe wolde
<brd>a keneo þei beden alle</brd>
Alle þt þer-inne were
herde 3et an-noþer bere
<brd>Right about nonn</brd>
Goþ besecheþ godes knyght
þt crist serueþ day & nyght
<brd>þt he bidde for Rome</brd>
<fol. 116va>þe pope & his clerkes alle ;
adoun on kneo þei gon falle
<brd>Befornn & behynde</brd>
and bede god almyghty king
þt he hem sende som tokenyng
<brd>wher~ þei myghte him fynd</brd>
Jhesu Crist þt is so mylde
Reuthe hadde of þis childe
<brd>þat is in care bounde</brd>
To hem seide heuene spouse
Goþ to Eufemianes house
<brd>þer~ he worþ y.founde</brd>
after þis steuenn vp þei stod
& heried god wiþ glad moed
<brd>alle þt þere were</brd>
For nought þe pope was so gramm
Eufemian he vndernam
<brd>wiþ wel sterne bere .</brd>
¶ wikke man whi hastou hyd
þat he ne moste er beo kyd
<brd>þe holy man .</brd>
þe emperour began to chide
& fele oþer~ þt stode beside
<brd>toward Eufemian</brd>
Naþeles wiþ hem he 3eode
þe pope & many of þe theode
<brd>toward his hous þo</brd>
þe pope self & þ+emperour
sought halle þei souhte bour
<brd>so wel so þei coude go</brd>
þei soughte him one stounde
atte laste þei him founde
<brd>þer~ he lay on bedde</brd>
þoruh an hyne hem tolde be mouþe ;
þat of his lyf mychel couþe
<brd>and hem ywissed hedde</brd>
¶ Beforen þe bed þei stoden þo
þe pope & þ+emperour also
<brd>ac þei ne dorste ouer him trine</brd>
þei wende he wer~ liues man .
ac his gost was out gan
<brd>Brought he was of pyne</brd>
Eufemian adoun bey3
his hond his neb he vnwrey
<brd>wiþ michel drede</brd>
so suete smel of him tey3
þat alle þt wer~ ney3
<brd>wonder of him heuede</brd>
¶Out of his mouþ þer stoed a+leomm
Brighter~ þan þe sonne-beomm
<brd>þt al þe stede atende</brd>
adoun þei fellen all on kneo
to thanke god þt is so freo
<brd>of wonder þt he sende</brd>
Toward god he gan his hondes holde
a writ betwene þei seye folde
<brd>þei þt wer~ þer-inne</brd>
Eufemian adoun bey3
þt writ he drow & 3erne tey
<brd>he ne myght it out winne</brd>
þe pope her-of was adred
Jn his herte god he bad
<brd>þt him grante sholde</brd>
þat writ þt was in his hond
þat þei myhte it vnderstond
<brd>betokne what it wolde</brd>
¶ þe pope to þe bed bey3
þe writ of his hond he tey3
<brd>Right wiþ-outen gynne</brd>
þat writ he began to sprede
& to foren þe folk to rede
<brd>þt weren þer-inne</brd>
<fol. 11vb> þo eufemian was y-war
þat his sone lay þar
& so long had wiþ him beo
he fel in swounyng on þe molde
allas he seide þt euer~ . J . sholde
so vnkynde beo
Be a stounde he gan vp stonde
Tar his her & wrong his honde
þt þe folk myghte rewe
þei weopen & made reuly cry ;
for him þei wer~ wel sory .
þat þei him euere knewe
¶ a wey lord þt herest my bone
whi helestou my leoue sone
so long in my house
þat wee ne moste him knowe ;
and for3ete mychel wowe .
boþe J . & my spouse
Awey my sone listou her~
& euer~ . J . hoped of þe to here .
a-lyue þat þou were
Me þenkeþ myn herte wile breke ;
þt J . ne may wiþ þe speke
allas þt J . ded nere
¶ þe noyse into þe bour~ sprong
of þe sorwe was hem among
þat in þe halle were ;
his moder was wel sory ;
& axed what were þt cry .
þt she herde wiþ ere
Of hir~ sone men tolde anon ;
þat out while was . y.gon .
& hou he was y.founde ;
& hou he hadde þer-inne woned .
& þis werldes blisse shoned .
and tholed harde stounde .
¶ þo she herde of hir~ sone ;
þat he was a3ein come ;
out of bedde she sprong
al hir~ yuel she for3at ;
and hardiliche held hir~ gate .
al þat folk among .
war anon par charite ;
Let me go my sone to seo .
And myn oune fode
þe teres felle to hir~ kneo ;
þat al þe folk myhte seo
þe brest orn al o blode
<fol. 117ra>¶ so sone so she to him comm ;
vpon þe liche she fel y.lome .
and kiste it wel 3erne
she kist his neb she kiste his hond ;
on þe liche she lay . & nolde not wond
Mighte no+man hire werne
allas my sone my dere lyf ;
soriere nas neuere wif .
þan . J . am for þe nouþe ;
For . J . hopede euer~ þe to seo ;
Er . J . diede & speke wiþ þe .
and kisse þe wiþ mouþe
¶ ac al myn hope is y.lore ;
Nou þou list ded me before .
& wiþ me ne myght speke .
Lord Crist . J bidde þin ore ;
Ne let me liuen na+more .
ac let myn herte breke .
she wrong hir~ hondes & siked sore
and totar hire lokkes hore .
as she were woed
Leoue sone bidde J . þe ;
Let me dien nou wiþ þe .
Mi lyf nis not goed
¶ sone þo comm his wif
þat louede him as hir~ lyf
To þe hous ago ;
so sone so she com him to ;
betwene hire armes she gan him fo
& kissed his mouþe þo
awey my leof what hastou do ;
whi hastou holde þe so
Jn þin oune house ;
þat non ne most comm þe to ;
so freond au3te to oþer do
Ne . J . þt was þi spouse
allas þat . J . was woman bore
Nou . J . haue þe forlore
My leof so hende ;
sorwefulliche me is dyght ;
Nou þou wiþ me speke ne myht
J . ne recke whider to wende .
vp she stod beforn hem alle ;
to-drouh hir~ heer & hir~ calle .
as she were feye ;
Bitter teres she let falle .
for hire þei wer~ sory alle .
þat hir~ wepe seye
<fol. 117rb> ¶ so mychel sorwe þer was ;
Bot who so hadde a tong of bras
<brd>ne myghte it al telle ;</brd>
þe day was almest do ;
þe pope & þ+emperour also
<brd>Might no lenger dwelle</brd>
þat liche þei let wake & shride ;
wiþ pal & wiþ oþer pride
<brd>þt þei founde þere</brd>
wiþ muchel ioye & hey song
þe bisshopes hem alle among
<brd>þe corps to chirche bere</brd>
Amydde ryght þe heye strete
so mychel folk þei gonne mete
<brd>þt þei most astonde .</brd>
¶ alle seke þat to him come
y-helede were . y.lome
<brd>Of feet and of honde</brd>
þe blynde come to her~ sight
þe crokede gonne to righte
<brd>þe lame to go</brd>
þat doumbe wer~ fonge speche
þei heried ˆ [god] þe soþe leche
<brd>& þe halwe also</brd>
þe day 3eode & drouh to nyght
No lenger dwelle þei ne myght
<brd>to chirche þei most wend</brd>
þe bellen begonne to rynge
þe clerkes for+to singe
<brd>Euerich in his ende</brd>
¶ þo þei to þe chirche cam
Glad þei were eche of ham
<brd>þt þer-inne were</brd>
þe pope & þ+emperour
before þe auter of seint sauour
<brd>sette þe bere</brd>
aboute þe ber~ was mychel lyght
wiþ fair pal it was betyght
<brd>& wiþ cloþes of golde .</brd>
For+to honour~ þis holy man .
Of al þt lond folk þider cam
<brd>þt fayn wake wolde</brd>
alle seke þat þere were
as sone as þei turned þe bere
<brd>hole þei were anon</brd>
Of þe yuel þt þei hedde
Jf þei in þe nome bede
<brd>Of þis holy mon</brd>
¶ To chirche comm 3ong & olde
þat holy corps to beholde
<brd>þt þider was y.brought</brd>
a wel gentyl marbelstonn
To louke inne his holy bon
<brd>sone was y.sought .</brd>
þe thridde day was y.come
so me dide þe londes wone
<brd>Men dide þe seruise</brd>
þeder~ comm more & lasse
þe pope self song þe masse
<brd>wiþ-outen feyntise</brd>
þo þe masse was y.do
þe pope & þ+emperour also
<brd>þe holy corps þei kiste</brd>
þei nome þo ye holy bon
& leide it in a marbelston
<brd>y-loke in a chiste</brd>
Alle þilk þt þer~ were
heried god wiþ loude bere
<brd>& crieden mercy</brd>
Of þe wonder þt he dide
Jn þe selue holy stede
<brd>For loue of alexij</brd>
<fol. 117va>Beseke we 3erne & ofte ;
Jhesu þat vs deore boughte
<brd>þat he vs grace sende .</brd>
þat we mote him seruy
and for þe loue of alexij
<brd>To his blisse wende AMEN</brd>