<County: Norfolk>
<Code: L4646>
<MS reference: Cambridge, St John's College 28 (B.6)>
<Text: South English Legendary>


<Tranche 1>

<fol. 31r>So foul it was þt our~ lord . non <2 letters> suffren wolde o lyue
jn mannys fourme þt he hadde take . þerfore he lete hem dryue
Sterrys honoured ek our~ lord . þo he was j-bore
for Balaam þe prophete seyde . many hundred 3er be-fore
þt a sterr~ springe schulde . of jacob is kende
and euere after þo men hadde . þat sterr~ in her~ mende
& prayed þt a-mong hem þer-of . Sum tokenyng schulde come
So þt þe hey3est men of þe lond . a counseyl hadden nome
þt twelue stronge men . euery ny3t to waken þei toke
vp-on an hill þe longe ny3t . after þt sterr~ to loke
Sone after þt our~ lord was bore . as he wolde it wer~
þre kynges come for þt sterr~ . to lokyn after þere
3if þei my3t hym se . þat o kyng hy3t hy3t jaspar
þat oþer was hotyn Melchior . þe þridde Balti3ar
jn her~ prayerys þei wer~ longe . til our~ lord hem sente
Sum tokenyng of þt sterr~ . or þei homward wente
þo þei say a sterr~ in heuene . ry3t bry3t as þei stode
& in þe sterr~ þer~ þei sey3 . a child al blody don on rode
þo be-gan þt child to speke . goth now faste he sede
to þe lond of jude . a-noþer sterr~ 3ow schal þeder lede
þo loked þei as eftward wer~ . a noþer sterr~ þei sey3e
so cler a þing and so bry3t . þei saw neuere wt ey3e
þer 3e schul fynde a kyng born . þt kyng is of all kyngys
of qwom 3e desyr~ so meche . to knowe of his tokenynges
glad þei wer~ þo þei sey3e . þt þei desyrede so longe
vp dromedarijs þei wente forth . þt swyfte ben & stronge
& beste durynge of alle bestys . for neyþer hors ne mule
schulde not so meche a-gon . in so litil a qwyle
of þe lond of Arabye . and of Perce þei were
so fer be efte þe lond is . þat no man wonyth þer~
a gret water þt men calle Saba . in þe lond of Perce is
þerfore men clepen al þt lond . þe lond of Saba j-wis
þerfore kyng dauyd of our~ lord . in his sau3tter sumqwyle sede
þt kyngys of Saba & arabye . 3iftis to hym schulde lede
þei ledde hym presauntes for he was kyng . & no man kyng ne sou3t
ne to hym cam in þe olde lawe . but men presauntes brou3t
gold Myrr~ and encens . þese þre kynges hym ladde
euerych of þese presentes . gret tokenyng þei hadde
gold is þing of gret nobley3e . þt fallith to a kynge
þerfore as he a kyng was . gold þei gunne hym brynge
encense fallith to holy cherche . & for he was in þou3t
prist & mayster of holy cherche . encens to hym þei brou3t
Mirr~ is ry3t bitter þing . a-noþer vertu it hath also
þat noþing schal þer rotyn . þt it comyth ny to
<fol. 31v>þerfore qwan an hy3 man deyde . be olde day3es men wolde
jn his sepultur~ myrr~ don . þt he rotyn not scholde
þe bitternesse of þe myrr~ . þt þei to our~ lord þo brou3tte
tokened strong & luþer deth . þt jewis to god wrou3tte
þe myrr~ halt a ded man hol . leyd in his bery3inge
our~ lordes bery3ing it be-tokened . euere wt-outte rotynge
Anon þese þre kyngys wentyn forth . & her~ presauntes nome
fro þe ferþest lond of þe est . til þei to jerusalem come
þt þe mydel is in erþe her~ . and þeder þei wer~ brou3t
in twelue dayes & many folys . þerfore leuyn it nou3t
as j seyde of dromedarijs . þt þei vp on wente
swyft weryn & wt goddes grace . so sone þeder hem sente
þo þei come to jerusalem . ferst þei hadde þer trewis
þei askid qwer~ þt child was born . þt was kyng of jewis
þo þt herodys herde of þis . a-greuyd he was wol sore
his clerkys he dede clepen forth . þt wis wer~ in lore
þe clerkys sou3tte her~ bokys a-non . 3if þei my3t forth brynge
of ony prophete þt hadde told . of ony suych þinge
of o prophete he fond j-wrete . þt bedlem was not leest
jn þe kyngdam of jude . but wacloker~ he was meest
for of bedlem schuld come a duk . þt jsrael schulde wyte
þese clerkis tolde þe kyng þerfore . qwan þei fonde it wryte
þis kyng enqueryd þo of clerkys . for he was a-gast
qwy þt sterr~ was so wunderfull . & how longe it hadde last
þo he hadde þer-of enqueryd to þo þre kynges he sede
goþ & aspy3ith of þt child . 3our~ presentis hym lede
comyth a-3en homward be me . & tellyth me tydyng
þt j may forth wt 3ow . fayr~ presentys hym bryng
so he seyde for he wolde hem sle . qwan he wiste qwer he wer~
þese þre kynges wentyn hem forth . & comyn no+more þere
þo þei come ferst to jerusalem . þe sterr~ fro hem was hyd
þt þei schulde after our~ lord aske . þt his berþe tyme wer~ kyd
þt þo jewis schulde not forsake . þt he was born a-mong hem þer~
but a-non as þei went fro herodys . þe sterr~ hem þe wey3e gan ler~
& wenten ry3t euene forth þe wey3e . as it quyk þing wer~
to teche þo kynges to bedlem . þt þei disceyued nere
jn þt sterr~ be-forn alle oþere . þre wunderys sen men my3t
of her~ stede . & of her~ wendyng . & also of her~ ly3t
of her~ stede . for sche was . in þe eyr boþe hy3 and lowe
& ˆ <mrg>not</mrg> wtere in þe firmament . for men schulde þe soþe knowe
of hir~ wendyng . for sche wente . as þu seest a quyk beste gon
to lede þe kynges þe euene wey3e . so dede 3it neuere non
<fol. 32r>of her~ ly3t for so cler a sterr~ . neuere seyn þer nas
al was don to honour~ hym . þat in erþe born was
and euere wente þe sterr~ forþ . & ladde þe kynges be-fore
til þei come to þat stede . þer~ þat þe child was bore
but þo he was þer ouere-come . wol stillelyche he gan stonde
þan hoped þo kynges þt child to fynde . þei sou3tte so fer in londe
þei comyn in & fond þt child . with his moder Marye
but joseph fonde þei nou3t . lest þei þou3t in ony foly3e
þt þe child hadde his sone be . & his moder on-clene wer~
þese þre kynges knelyng to our~ lord . & her~ presaunt hym bere
gold and Myrre & encens . as j haue told be-fore
as fore her~ lord þt child þei helde . þt þer was so bore
an aungel cam & bad in her~ slep . þt þei schulde not wende
be herodys þe kyng to telle hym fore . he þou3t þt child to schende
þei spokyn of a-cord & wente forth . a-non qwan þei a-wook
jn schippis al be water . & þe hy3e wey3e clene for-sook
but þo þei come ferst to bedlem . þer as þe child lay
þe fourteþe day as þe child was bore . as a Candelmasse day<blank line>
our~ lady dede hir~ cherche gong . as it fil in hir~ lay
to coluyr bryddes þei nome . & a peyr~ of turtures also
& offred in þe temple with þe child . as men wer~ woned to do
for þe lawe was þt euery woman . þt of gret power wer~
a lomb to offr~ wt hir~ child . qwan þei to þe temple it ber~
but pore women þt þer wer~ . and non oþer qwar þei nadde
schulden culuerys offren or turturys . wol fayn þt þei hem hadde
Fro þt tyme our~ lord was bore . al þe tyme þt he was here
to 3eue vs ensample he dede . to be meke in euery manere
wt coluerys & wt turturys þei toke for lomb hadde þei non
þe offryng of þe turturys þei toke to þe temple þei gunne gon
þer þis blissid child offred was . on Candel-masse day
and þo four~ bryddes forth wt hem . as it fel in her~ lay
an old man þer was in þe temple . þt hoten was Symeon
an . C . wynter he was old & twelue . vnneþe he my3tte gon
desired he hadde al his lyue . & to our~ lord prayed be-fore
þt he schulde neuere dey3e . til he say our~ lord bore
so gret wil he hadde hym to abyde . þt qwan ony man come
euere he hopede to her~ sum tydynge . aske he wolde j-lome
wenyst þu þat he wil be bore . and þt j may hym se
wenyst ou3t þt j endur~ mow3e . til þt he bore be
Ansuer~ he hadde of þe holy gost . þt he schulde neuere dey3e
or he say our~ lord here born . in erþe with his ey3e
þt be-heste he a-bod longe . þat was in Febilnesse brou3t
and naþeles for hope hym to se . his elde greuyd hym nou3t

<Tranche 2>

<fol. 76r>þu wunne al man-kynde wt a tr~ . & now þu hem hast lore
þorw a tr~ & þin foly3e . wo wurþe þe þerfore
þi joy3e is clenlyche þe be-nome . þu knowist not how meche wo
þu schalt han with me in helle . for þi dede euere-mo
þo tok our~ lord Sathanas . and bond hym swyþe faste
& seyde he schulde not þens go . qwil þe world laste
Adam he toke vp be þe hond . come forth he seyde wt me
and alle þin þt ben goode . comyn þei schul wyth þe
þorw a tr~ 3e wer~ alle lore . & þorw a tr~ eft 3e beþ
þorw my deþ to lyue j-brou3t . as 3e now wel seþ
þo seyde Adam our~ ferste fader . lord j þanke þe
þt þu me takist & suffrest not . my fomen ouercome me
lord j haue to þe jgrad . and þu me herd hast
þu hast of þi grace saued me . now fro helle last
beþ glad and syngiþ to our~ lord . alle þo þt his ben
for in his wil is deþ & lyf . as 3e now wel sen
syngiþ now seyde dauid . to our~ lord a newe song
for he haþ her~ wunderys don . wt his power so strong
his ry3t-fulnesse he haþ schewed . a-mong vs ful wel
of his mercy haþ vnderstonde . þe meyne of ysrael
þo seyde alle with . o . voys . þe blisse þt we seþ
& þat be schewid euere vs wurþe . & alle þt wt hym beþ
he is . o . god & euere schal . in þe world wt-outtyn ende
rewarde he wil vs in þe ioy3e of heuene . for þeder we schul wende
our~ blissid lord alle þo deueles . in gret mysese brou3t
& ladde forþ his hand-werk . þt he so der~ a-bou3t
seynt Myhyl he hem be-tok . in heuene for to brynge
& hym-self as his wille was . wente to his vp-rysynge
þo comyn a-3ens hem tweyn olde men . & askid qwat þei wer~
and qwy þei hadde not in helle be . qwil þt þei wer~ þere
we ben he seyde Ennok & Elye . & prophetis we ben twey3e
we suffred neuere erþelyche deþ . þerfore we ben bey3e
jn erþely paradys . and til domysday we schulle
be þe frut of þe tr~ of lyf . we lyuen & ben fulle
we knew þorw þe holy gost . of 3our~ blissid comyng
þerfore we comyn 3ow a-3ens . we moun 3ow no ferþere bryng
a-noþer þer com a-3ens hem . as þow3 he come fro dome
as a presoner a rode he bar~ . we askid fro qwens he come
so lyche a þef as he was . 3e seyn soth he seyde
a þef j haue euere ben . & don many a wikkid dede
on þe rode j was wt god do . but or j ded wer~
j vnderstood þt he was god . þorw his myraclis þer~
j be-sechid hym þo of for3euenesse . and he me 3af a-non
for joy3e of 3ow j haue a-byde . & now wil wt 3ow gon
<fol. 76v>seynt Myhyl ladde hem alle þorw3 . þe water of jordan þer~
þt þei my3t þer cristened ben . as our~ lord hym-self was er~
for þer may no man to heuene come . but he cristened wer~
jn water or in his owene blood . as þe book doþ vs lere
& to soþe þt our~ lord lete . boþin water and bloode
vp-on þe rode out of his syde . & al for our~ goode
lentik and karyn þo twey breyerin . seynt Myh3il bad þo
and also many oþer soulys . to her~ bonys in erþe go
& wt þe bodyes þei hadde in erþe . fro deþ to lyue a-ryse
wt our~ lord to honour~ hym . & to makyn his son a-gryse
many on ros fro deþ to lyue . suych as þei in erþe wer~
& 3ede a-bou3tte in-to al þe lond . & summe be-lefte þer~
al þt Ester with her~ frendis . but at Ester þorw3 goddes ore
þei wer~ take in-to þe eyr . men my3t se hem no more
no more we dar~ her-of telle . but doþ yow wel schryue
& boteþ 3our~ synnys þt 3e han don . ellis come 3e neuere to lyue
boþin þese breþerin begunne at o tyme . & at o tyme þei hadde do
and al þei had wryte euery wurd . & euery letter also
þo þei hadde al þis wrete . caryn nome his book
Cayphas & gamaliel . and he to hem be-took
but Nichodemus & joseph . lentyk be-toke his
& sore þei wer~ alle a-dred . qwan þt þei say þis
lentik & Caryn þese twey berþerin . oþer colour þei nome
þei be-comyn as qwy3t as+ony snow . wist no man qwer þei be-come
þt neuere more men wist of hem . þe jewis dradde ecchon
but joseph & Nichodemus . to Pilat þei tolde a-non
þo wer~ þei alle sore a-drad . 3if þt þis out come
þt þe emperour hem wolde sle . gret counseyl þer-of þei nome
for joseph a-3ens hem was . & wt our~ lord held faste
& for þo myraclis þt of hym was . þe schrewis weryn a-gaste
þat he wolde hem þer-of wrey3e . þerfore at þe laste
a strong presoun þei made with wallis . & þerin þei hym caste
& be-walled hym al a-bou3tte . for hunger þt he schulde dey3e
no man toward hym þer come . ne no+man hym þer sey3e
but fourty 3er þer afterward . as we fynde wrete
þis good+man was o lyue founde . as 3e schul sone wete
Pilat durst not fro jerusalem . a-3en wende to Rome
for þe trespas þt he hadde do . lest þe emperour hym nome
þe emperour hem send wurd for all . oftyn þat þei schulde
as ry3t was to hym bowe . but euere þei seyde þei nolde
our~ lord for-bar~ hem longe also . & ofte myraclys sende
a wunder þretnyng for her~ trespas . 3if þei wolde a-mende
þe seuenþe 3er þt þei hadde . slawn hym on þe rode
seynt Jeme he sente þeder . to prechen hem to goode
her~ trespas to knowlyche . & lyue as þei schuld don
þe schrewis slow þis good+man . in strong deþ a-non
<fol. 77r>3it our~ lord hem forbar . and sent hemer tokenyng
3if þei wolde her lyf a-mende . he wolde not . to þe+deþ hem bryng
ouyr þe cytee a kene swerd . þer was seyn euery ny3t
al a 3er in þe eyr on hy3 . and in þe poynt a sterr~ bry3t
þe sterr~ be-tokened our~ lordes grace . 3if þei it wolde fonge
þe swerd be-tokenyth 3if þei wolde not . veniaunce ful stronge
þei say oftyn so meche ly3t . a-bou3t Ester tyme at myd-ny3t
þer~ þt þei our~ lord slow3 . þt al þe countr~ was bry3t
sumtyme in þt feste . a gew a calf he nome
for to don his sacrifyce . and to a lomb it be-come
Sumtyme an hy3 in þe eyr . cartys þei sey3e fle
ful of men wel-armed . þt euery man my3t se
þt be-tokened her~ destructioun . but þei a-menden wolde
& be-leuen in ihesu crist . but neuere þo schrewis nolde
þo armed men betokened . al redy for to fy3t
þt þorw strengþe of armys . be-nymen schulde her~ my3t
jn þe eyr þei herde þese wurdis . þe qwyle þt 3e ben sounde
go ˆ <mrg>3e</mrg> fro þis wrecchede stede . for it wurþe j-brou3t to grounde
jn þe ny3ne & þritty 3er . þt þei slow our~ lord þere
þe jewis maden a gret feste . as it fel in þe 3ere
þo was þer oon of hem . þat lowde be-gan ˆ [for] to grede
he wist not hym-self qwat it was . but þese wurdes sede
men schul telle fro est & west . & fro þe wyndes also
þe wrecchedede þt jerusalem . & þe temple is comyng to
þese maystris hym toke swyþe faste . & askid qwy he so sede
þei my3t han of hym non oþer wurd . but euere oon he gan grede
be-forn þe prince he was lad . and euere he seyde on
þei gunne to bete hym & defoule . þt men my3t se euery bon
euere on he seyde & lowde cri3ed . & at þe laste he seyde þerto
a-wey wrecchid jerusalem . qwat schalt þu now do
alle þese tokenynges our~ lord hem sent . 3if þei wolde turne her~ þou3t
& to a-mendement come . but þo schrewis wolde nou3t
No wunder þow3 our~ lord suffred . þt þei wer~ to schame brou3t
telle j wil her~ destruccioun . how he was ferst wrou3t
Pilat was euere þer~ . he durst not þens wende
he drad euere þe emperour . þt hym sle wolde at þe ende
Sore wer~ þe jewis alle a-drad . þt he hem wolde destroye
þerfore þei held hem faste in fer~ . þei wolde hym not obey3e
as to his lord he was a-drad . til he wer~ j-come
and seyde þt he giltles was . of ihesu cristis dome
but þe jewis hym slow wt-outte hym . & also hym nome
and bad hym his wraþþe for-3eue . as he had be-sou3t <3 letters> ylome
and graunte þt he muste . in good pees & loue come