<County: Yorkshire North Riding>
<Code: L0126>
<MS reference: Northallerton, North Yorkshire County Record Office, ZRL 1/20>
<Text: Commissioning agreement>


This endentour made atte Burgh the aghtende day of the Moneth of Aprill the yere of kenge herry ferth after the conquest of Jngland thrittenede be-twix dame katerine of Burgh somtyme the
wife of John Burgh william of Burgh the sonne of the forsaide John and dame katerine of the ta partie And Richarde of Cracall mason on the tother partie bere3 witnes that the forsaid
Richarde takes full <ill><1 word></ill> forto make the kirke of katrik newe als werkemanschippe and mason-crafte will And that the forsaide Richard sall fynde alle the laboreres and seruys
pertenand to the kirke makyng~ And that the forsaide Richarde sall take downe and ridde of the stane-werke of the alde kirke of katrik after the tymber be tane downe And he sall
cary and bere alle the stane-warke of the alde kirke to the place whare the newe kirke sall be made And also forsaide Richarde sall take the grounde and ridde the grounde whare the
<ill><2 words></ill> sall be made And the forsaide Richarde sall gette or garre gette atte the quarell atte his awen coste alle the stuffe of the stane that misters more for the makyng of the
kirk of katrik than that stuffe that is foune with-in the kirke yerde beforsaide And also the forsaide Richarde byndes hym be this endentour that he sall make the kirke and the quere
of katrik newe als werkemanschippe and mason-craft will that is to say the quere salle be of lenght within with the thiknes of bath walles fifti fote And it sall of breede wtin
that is to say with-in the walles twa and twenty fote And the forsaide Richarde sall make a wyndowe in the gauill of fife lightes acordaunt to the hight of the kirke
couenabely made be werkemanschippe and mason-crafte And he sall make apon the cornere of the southe side of the same windowe a franche botras rising vnto the tabill yt
sall bere the aloring~ And he sall make a wyndowe of twa lightes atte the awter ende couenably made be werkemanschippe and mason-crafte And a botras risyng vnto the
tabill als it is before saide And he sall make a wyndowe on the same side of twa lightes and a botras acordaunt thare-to on the same side And the forsaide Richarde sall make
<ill><lost in crease, ?8 words></ill> <?>tras that it will best be and a windowe of twa lightes anense the deskes And on the cornere of the northest ende of the forsaide quere he
sall make a franche botras acordaunt to the hight be-fore-saide And the forsaide Richarde sall putte oute tusses for the makyng of a Reuestery And he sall make a dore on
the same side for a Reuestery and a botras acordaunt to the hight be-fore-saide And the forsaide Richarde sall sette a wyndowe of thre lightes anens the deskes the whilke
stande<?> nowe in the olde quere on the southe side The hight of the walles of the quere be-fore-saide sall be abouen the grounde twenty fote with a-n+aluryng abowne that <lost, presumably is>
to say with a course of aschelere and a course of creste And also the forsaide Richarde sall make with-in the quere a hegh awter ioynand on the wyndowe in the gauill with thre
greses acordaunt thare to the laghest grese begynnyng atte the Reuestery dore with thre Prismatories couenably made be mason-crafte with-in the same quere And the forsaide
<ill><3 words></ill> the body of the kirke acordaunt of widenes be-twene the pilers to the quere And the lenght of the body of the kirke sall be of thre score fote and tenne with the thikn<end lost>
of the west walle And on aither side foure arches with twa eles acordaunt to the lenght of the body And aither ele sall be made of breede of elleuen fote with-in th<end lost>
walle And the forsaide Richarde sall make a windowe in the southe ele that is to say in the este ende of thre lightes acordaunt to the hight of the ele with a franch<end lost>
botras risand vnto the tabill couenabely made be mason-crafte And a wyndowe of twa lightes atte the awter ende a-pon the southe side with a botras dyand vnder the <ill><1 word></ill>
And then a wyndowe of twa lightes with a botras and a dore And also the forsaide Richarde sall make a windowe of twa lightes with a franche botras in the
southewest cornere acordaunt to the botras be-fore-saide And he sall make a windowe of a light in the west ende of the same ele And the ele sall be alourde acordaunt to
the quere with an awter and a lauatory acordaunt in the este ende And also the forsaide Richarde sall take the wyndowe that standes now in the north side of the ald<end lost>
kirke and sette it in the este side of the norhe<sic> ele ouer the awter with a franche botras on the cornere dyand vnder the tabill And the forsaide Richarde sall make a wind<end lost>
of twa lightes atte the awter ende with a franche botras atte the mydwarde of the elyng~ and a dore and a botras on the northwest cornere And also the forsaide Richa<end lost>
sall make a windowe of a light in the west ende of the same ele and an awter in the same ele and a lauatory acordaunt thare-to . the ele alurde acordaunt t<end lost>
the tother The heght of the walles of aither ele vnder the tabill abouen the grounde sall be made of sextene fote hight And the forsaide Richarde sall make the pilers
with the arches and the clerestory of the hight of sax and twenty fote abouen erth vnder the tabill And also forsaide Richarde sall schote out tusses in the west
ende for makyng of a stepill And also fosaide<sic> Richarde sall make tablyng of the endes of the forsaide kirke of katrik with seueronne tabill And also the forsaide
Richarde bindes hym and his executours and+assingne3 be this endentour that the kirke of katrik beforsaide and neuende sall be made suficiauntly and acordaunt to th<end lost>
couenaunte3 beforsaide fra the fest of seint John of Baptist next folowand after the makyng~ of thes endentours safande the aloryng~ . vnto the same Fest of
seint John of Baptist be thre yere next folouande after that and fully fullfilled bot if sodayne were or pestilence make it the whilke may be resonabill excusac<end lost>
for the forsaide Richarde And forsaide dame katerine and william sall Cari alle the stane that misters ouer the stuffe more then is fon in the alde kirke and in
the kirke-yerde atte thare awen coste And also the forsaide dame katerine and william sall finde lyme and sande and water and scaffaldyng~ and synetres
be-houely to the same kirke atte thaire owen coste And when the kirke of katrik beforesaide is fully made and endid the forsaide dame katerine and william
sall hafe alle the scafaldyng and synetres vnto thaire owen vse Ande the forsaide dame katerine and william bindes thame be thes endentours thair
executoures and assingnes for-to pay vnto the forsaide Richarde and his assingnes for the makyng~ of the forsaide kirke of katrik newe als it is rehersede And
befor saide with-in terme of thre yere eght score of markes And if the kirke be endid atte the terme be-fore-neuende the forsaide dame katerine and william
sall gif vnto the forsaide Richarde tenne markes of mone and a gowne of william wering~ to his reward And also the forsaide Richarde byndes hym
be this endentoure3 that the quere of the kirke of Catrik sall be made newe fra the Feste of seynt John of baptist next folowand after the makyng of
thes endentoure3 vnto the same Fest of seynt John of baptist next folowand als be a yere And also the forsaide Richarde byndes hym be thes endentours
that he sall make the aloryng of the kirke of katrik newe be tho ˆ [Mysomer]mighelmes next folowand after the Fest of seynt John of baptist before-neuend that
the forsaide kirke of katrik sall be fully made and endid And that alle thes couenauntes beforesaide3 and neuende sall wele and trewly . be fullfyld
and done that forsaide Richarde falles for-to do be any mason-crafte or any other thyng be-for-neuende . the forsaide Richarde byndes hym his
heires and his executoure3 vnto the forsaide dame katerine and william thaire heires and thaire executoures in fourty pounde3 of gude
and lawfull mone of Jngland And that alle the couenaunte3 beforsaide and neuende sall wele and trewly ˆ [be] done and fullfilde of the forsaide dame kateryn and william behalfe that tham falles to do the forsaide dame
katerine and william be halfe that tham falles forto do the forsaide dame katerine and william byndys thame thaire heires thaire executoures vnto
<ill><2 words></ill> Richarde in fourty pounde3 of Mone be thes endentoures writyn atte Burgh the day and the yere beforsaide