Caroline studerer forretningsjus for å få gode jobbmoglegheiter

Kvifor valde du å studere Master i forretningsjus?

Interessa for lovverk og tal kom allereie på vidaregåande, så valet på bachelor i forretningsjus og økonomi i Trondheim vart naturleg for meg på den tida. Då eg var ferdig med bacheloren hadde eg bygd opp så stor interesse for skjæringspunktet mellom jus og økonomi at eg ville ikkje gje meg på skulebenken med ein gong.

Master i forretningsjus er bygd opp etter behovet som norsk næringsliv manglar, noko som forhåpentlegvis vil gje meg gode jobbmoglegheiter når eg blir ferdig utdanna.

Kvifor valde du UiS og Handelshøgskolen ved UiS?

Sidan studiekombinasjon jus og økonomi er nyetablert, så var ikkje moglegheitene så mange. Gleda var stor då eg fann ut at Handelshøgskolen ved UiS hadde satsa på denne masteren. I tillegg hadde eg høyrt mykje fint om Stavanger som gjorde at eg ville flytte hit.

Korleis ser ein typisk dag på UiS ut for deg?

Sidan eg er halvvegs pandemistudent så har heimekontor blitt flittig brukt. Eg føretrekk helst å kome på skulen i 08-tida, ete frukost, og snakke med studievener før eg finn meg ein studieplass; helst på biblioteket. Eg er stor tilhengar av å bruke 45/15 økter fram til eg tar lunsj med venene mine for så å halde fram med å lese til halv 4. Eg liker ein viss grad av kontinuitet i kvardagen, men det er også deilig å nytte seg av friheita til å gjere andre ting på dagtid for så å gjere skule på kvelden.

Har du eit minne eller noko som du hugsar ekstra godt frå studietida til nå?

Gjennom heile studietida mi har eg deltatt jamnleg på ulike bedriftsbesøk, arrangement og konferansar som har blitt tilbode gjennom linjeforeininga og studentsamskipnaden. Eg sitt spesielt igjen med eit godt minne frå ONS 2022 kor eg deltok for første gong. Det er utruleg fascinerande å sjå kva dei store energiselskapa får til når det gjeld teknologiske løysinger.

Kvifor bør folk velje å studere forretningsjus?

Dette er ei gylden moglegheit til å få ein ettertrakta kompetanse i skjæringspunktet mellom jus og økonomi. Du vil vere ein av dei første i landet med denne tverrfaglege kompetansen, noko som både er spennande og særeigent.

Kva er din draumejobb etter studiet?

Min draumejobb i framtida er å vere personalsjef innan industri. Men eg vil nytte moglegheita som nyutdanna til å oppsøke ulike sektorar og næringar kor eg kanskje blir introdusert for noko heilt anna.

Har du nokre råd for framtidige studentar?

Engasjer deg i verv, knytt kontaktar på kryss og tvers av linjer, og bidra til gode kollokviegrupper slik at studiekvardagen blir hyggelegare og lettare. Bruk vekedagane godt til å sjå på studiet som ein jobb, då er det mykje lettare å finne på ting utan dårleg samvit på ettermiddagen og i helgene. Du må yte for å nyte!

Les også: Helen Totland Christensen frå EY meiner ein mastergrad i forretningsjus gir det breie kunnskapsfeltet som bedriftar ser etter