Kva kjenneteiknar god velferd?

Korleis kan samarbeidet mellom rettsvesenet og velferdstenestene bli betre?

Forskingsprosjektet er finansiert av EU-kommisjonens Horizon 2020 MSCA RISE-program. Det er eit europeisk samarbeid som, på tvers av ulike etatar, undersøker samarbeidet mellom helse- og velferdstenester, og dessutan innverknaden strafferettsvesenet har på dei innsettes helse, velvære og sjansar for å bli verande lovlydige etter lauslating. Prosjektet ser òg på korleis tverretatlig samarbeid og utveksling av lærdom kan bli betre tilrettelagt. Ein arbeider med innovasjon, samarbeid og organisatorisk læring i skjeringspunktet mellom organisasjonar som støttar rehabilitering av innsette. Leiar for prosjektet er Sarah Hean.

Les meir om prosjektet her: Developing collaboration working between Criminal Justice and Welfare services

Cubansk og nordisk velferd

Prosjektet Cuban and Nordic Welfare skal gjennom gjensidig studentmobilitet og personalmobilitet auke kvaliteten og internasjonaliseringa av utdanning i sosialt arbeid og sosiologi ved dei to universiteta. Prosjektperioden er frå 2019 til 2023.

I løpet av denne tida vil det finna stad utveksling mellom 46 master- og doktorgradsstudentar frå University of Havana og University of Stavanger. Vidare vil prosjektet støtta internasjonalisering ved dei to universiteta gjennom felles master- og ph.d.-rettleiingar og gjesteforelesarar.

Institutt for sosiologi ved Universitetet i Havana og Institutt for sosialfag ved Universitetet i Stavanger gjennomføra felles aktivitetar som læreplanutvikling, undervisning, feltbesøk, rettleiing og forskingsseminar innan områda sosialt arbeid, sosiologi og velferdsstudier.

Familiebasert arbeid i norsk velferdsregime

Ein utfording i velferdsstaten er korleis familien vert brukt som ein ressurs i sosialt arbeid. Ambisjonen for prosjektet er å auke kunnskapsgrunnlaget om familieomgrepet og bakkebyråkratiets handlingspraksis i samarbeid med familien. Det blir då viktig å undersøke korleis omgrepet "familie" og familieperspektivet blir forstått og brukt av sosialarbeidarar i ulike velferdstenesteområde slik som Nav, psykisk helse og barnevernet. Kva vurderingar blir det lagt vekt på i familiebasert arbeid, og korleis får desse vurderingane betydning for utfallsmål som tiltaktsstrategiar og implementering?

UH Vest-prosjektet er eit samarbeid mellom UiS, Universitetet i Agder og Høgskulen på Vestlandet. Leiar for prosjektet er Siv Oltedal. Med seg frå UiS har ho Brita Gjerstad. Frå UiA deltek høgskulelektor Jorunn Gjedrem og førstelektor Torunn Alise Ask. Professor Kjetil Grimastad Lundberg bidrar frå HVL.

Utvikling av boligtilbud for ROP-beboere

Prosjektet har som mål å utvikle nye bustadar til personar med låg bu-evne grunna ROP-problem. For å nå målet vil prosjektet utvikle og teste modellar for medverknad, og utvikle, teste og implementere ulike tryggingstiltak. Prosjektet er knytt til bygging av nye bustadar i kommunane Karmøy og Stavanger.

Prosjektet heiter "Utvikling av nye boligtilbud tilpasset ROP-beboere med lav bo-evne, med vekt på brukermedvirkning" og er eit samarbeidsprosjekt mellom A-LARM, Husbanken, Høgskulen på Vestlandet, Karmøy kommune, NORCE, Snøhetta, Stavanger kommune og UiS.

Frå UiS deltar Aase Bø-Rygg og Brita Gjerstad. Prosjektet er finansiert av Regionale Forskingsfond.

Kor stort er behovet for bustader?

Prosjektet tar utgangspunkt i kommunen sitt behov for ein oversikt over bustadmassens tilgjengelegheit for å kunna føra ein heilskapleg bustadpolitikk. Målet er å utvikla ein modell for å berekna behovet for bustader og gi ein oversikt over tilgjengelege bustader.

Prosjektet har tittelen "Modellutvikling - behov og tilgang på tilgjengelige boliger". Det er finansiert av Husbanken og blir gjennomført i samarbeid mellom Eigersund kommune, NORCE og UiS. Frå UiS deltar Brita Gjerstad.

Teknologi i offentleg omsorg

Prosjektet "Caring futures: Developing new care ethics for technology-mediated care practices" (QUALITECH) er eit tverrfagleg prosjekt som samlar forskarar på tvers av fakultet på UiS og eksterne miljø. Det er finansiert av Noregs forskingsråd og analyserer forbindelsar mellom teknologi, etikk og omsorg frå ulike ståstader. Leiar for prosjektet er Ellen Ramvi ved Det helsevitskaplege fakultet. Programområdet Velferdstenesteforsking er representert ved Brita Gjerstad i ein arbeidspakke som tar for seg implementering av teknologi i offentleg omsorg, sett frå perspektivet til leiarar og leverandørar.

Her kan du lese meir om prosjektet: Etiske spenningar i teknologimediert omsorg