Sju råd for eit godt fellesskap i lesekvarten

I Regjeringa sitt leseløft er eitt av hovudtiltaka at elevar på alle klassetrinn skal lesa minst 15 minutt kvar dag.

Desse 15 minutta, òg kjent som lesekvarten for mange, blir ofte praktisert gjennom at elevane les stille og individuelt, gjerne i ei bok dei har valt sjølv. Det kan vera i 15 minutt, men det er ingenting i vegen for å bruka meir eller mindre tid, eller dela det opp i fleire mindre økter.

Samtidig veit dei fleste lærarar at stille og konsentrert lesing ikkje passar for alle elevane. Då kan det vera lurt å nytta dei 15 minutta til å bygga eit lesande fellesskap. Jo fleire elevar som kjenner seg inkludert i eit fellesskap, jo fleire kan sjå på seg sjølv som lesarar.

Og når ein ser på seg sjølv som ein lesar, og er medviten om kor mykje spennande som finst i bøkene, jo større sjanse er det for at eleven kan bli glad i å lesa.

Konkrete tips for å styrka lesefellesskapet i lesekvarten

• Les med blyant i handa

Gje elevane eit oppdrag om å notera noko frå teksten som dei skal dela med klassen. Det kan vera å skriva ned ei setning, eit ord, noko som var morosamt, trist eller rart frå boka dei les i.

• Snakk om det som er lese

Etter at elevane har lese stille i kvar si bok, kan elevane snakka saman om det dei har lese. Som ein samtalestartar kan du som lærar be elevane dela ei setning eller to frå boka.

• Del lesetips med kvarandre

Som ei avslutning på lesekvarten kan elevane koma med boktips. Dette kan dei gjera i plenum, i mindre grupper eller to og to.

• Vis interesse for det elevane les

Det kan du gjera på fleire måtar:
- Du som lærar kan gå rundt og spørja enkeltelevar om handlinga i boka, og kva dei trur skjer vidare.
- Du kan lesa eit kort utdrag frå enkeltelevar sine bøker høgt i klassen, og kommentera utdraget.
- Heng opp framsider av bøkene som elevane les. Då blir det synleg at elevane er eit lesande fellesskap.

• Ver eit lesande førebilete

For å styrka lesefellesskapet kan læraren også lesa stille i eiga bok saman med elevane.

• Les ein annan plass

Alt elevane treng i lesekvarten er ei bok. Det betyr at dei ikkje treng å sitja ved pulten. Å variera plassen ein les på kan styrka lesefellesskapet.

• Gjer valet av bok overkommeleg

For mange elevar kan eit stort utval av bøker i biblioteket gjera det vanskeleg å velja. Samarbeid gjerne med ein bibliotekar om å setja fram bøker å velja mellom, eller lag eit lite klassebibliotek.

Lykke til med å skapa gode lesefellesskap i klasserommet ditt, og dermed bidra til at elevane blir betre lesarar!