Milliongåve gir masterstudentar praksis i reiselivsnæringa

Tilbodet skal gi studentane praksis i næringa og sikre betre rekruttering til reiselivs- og servicebransjen.

Internship skal inngå som eit emne på 10 studiepoeng i masterprogrammet Serviceledelse i internasjonal business og gjennomførast over eitt semester i ei verksemd i næringa.

– Vi er utruleg takksame for denne tildelinga. Midlane gir oss høve til å etablere ei ordning som kan gjere ein konkret skilnad for masterstudentane våre. Gjennom eit internship får studentane høve til å bruke kunnskapen sin i praksis, samtidig som dei får verdifull arbeidserfaring, byggjer nettverk og blir betre kjende med arbeidslivet dei skal ut i, seier professor Trude Furunes, som skal leie arbeidet.

Frå teori til praksis

Hotell-, reiselivs- og servicenæringane har behov for fleire kandidatar med leiarkompetanse og relevant arbeidserfaring. Studentane manglar ofte praktisk erfaring når dei går ut i arbeidslivet. UiS ønskjer med internship-satsinga å styrkje koplinga mellom teori og praksis gjennom ei praksisplassordning hos bedrifter.

For studentane vil tilbodet gi praktisk erfaring, sterkare arbeidslivsrelevans i studiet, betre karrieremoglegheiter og nettverk i bransjen.

Næringa vil på si side få tilgang til kvalifiserte kandidatar og ein moglegheit til å rekruttere talent tidleg.

– Vi ønskjer at Ellen & Axel Lunds stifting skal vere ein aktiv bidragsytar til utviklinga av hotell-, reiselivs- og servicenæringa. Derfor er dette eit prosjekt som treff godt med det Ellen og Axel Lund sjølve var opptekne av: utdanning, kompetanse og ei sterk kopling mellom skule og arbeidsliv. Det er inspirerande å kunne vidareføre denne arven gjennom ei moderne satsing som gir studentar verdifull erfaring og samtidig kan bidra til å styrkje rekrutteringa til næringa, seier Maren Skjelde, styreleiar i Ellen & Axel Lunds stifting.

Skal møte reelle utfordringar

No startar arbeidet med å etablere tilbodet, som vil vere tilgjengeleg frå hausten 2027. Innan tre år skal UiS tilby minst 20 praksisplassar på dette studieprogrammet.

Fleire store aktørar har sagt ja til å delta i ordninga, mellom anna HEIMR Collection, Thon Hotels og Havila Kystruten. Også andre verksemder har signalisert interesse.

Studentane skal arbeide med reelle problemstillingar og utfordringar i verksemdene dei er utplasserte i. Kvar student får ein mentor i bedrifta og ein fagleg rettleiar frå UiS. Studentane skal analysere og løyse reelle utfordringar i verksemda, og internshipet skal kunne danne grunnlaget for masteroppgåva som blir skriven i det påfølgjande semesteret.

– Vi ønskjer å byggje ei endå sterkare bru mellom universitetet og arbeidslivet, slik Kunnskapsdepartementet også oppfordrar til. Internship gir studentane ein unik moglegheit til å lære gjennom møte med reelle problemstillingar og utfordringar i verksemdene. Samtidig får arbeidslivet tilgang til engasjerte masterstudentar med oppdatert kunnskap og nye perspektiv, seier Furunes.

Ei moderne vidareføring

At nettopp Ellen & Axel Lunds stifting bidreg til satsinga, gir prosjektet ein særleg historisk dimensjon.

Ellen og Axel Lund hadde eit sterkt engasjement for hotell- og reiselivsnæringa, utdanning og kompetanse. Då Norsk Hotellfagskole (NHS) flytta til Sola Strand Hotel i 1952, blei undervisninga tett knytt til praktisk arbeid. Hotellet fungerte som skule om vinteren og hotell i sommarsesongen, og elevane fekk relevant erfaring frå næringa gjennom arbeidet på hotellet.

I dag blir ideen om å kople utdanning og praksis vidareført gjennom ein ny modell for masterstudentar ved UiS.

– Det er ekstra meiningsfullt at denne satsinga blir støtta av Ellen & Axel Lunds stifting. Allereie då NHS var på Sola Strand Hotel, var koplinga mellom utdanning og praksis ein viktig del av læringa til studentane. No får vi høve til å vidareutvikle denne tradisjonen i ei moderne form, tilpassa dagens masterutdanning i serviceleiing, seier Furunes.

Skal utviklast saman med næringa

Handelshøgskulen ved UiS og NHS – Kompetansesenter for hotell, reiseliv og serviceleiing, som er vidareføringa av Norsk hotellhøgskole, startar no arbeidet med å etablere ordninga i samarbeid med verksemder i næringa.

Målet er å skape ein langsiktig møteplass mellom studentar, universitet og arbeidsliv – der studentane får praktisk erfaring, medan næringa får høve til å bli kjend med og rekruttere framtidige kandidatar.

– Ambisjonen er at dette skal bli meir enn ein praksisplass. Vi ønskjer å utvikle eit godt samarbeid mellom studentar, verksemder og universitetet, der alle partar lærer av kvarandre. På sikt håper vi at ordninga kan bidra både til betre arbeidslivsrelevans i utdanninga og til å styrkje rekrutteringa av kompetente kandidatar til næringa, seier Furunes.

Er du interessert i å vere internship-bedrift? Ta kontakt med Trude Furunes.