Næringsforeningen og UiS ønsker å vere den leiande regionen i landet på samarbeid mellom universitet og næringsliv. No skal dei gjere det endå meir attraktivt å studere i regionen.
Studentrekruttering er eit viktig samarbeidsområde mellom Næringsforeningen i Stavanger-regionen og Universitetet i Stavanger. Nyleg vart ein ny samarbeidsavtale signert.
Skal gjere det endå meir attraktivt å studere i regionen
I tråd med avtalen skal partane samarbeide om å gjere det endå meir attraktivt å studere i regionen ved å styrke kunnskapsoverføringa mellom næringslivet og studentar i studietida, og marknadsføre særleg næringsrelevante studieplassar under overskrifta «kvifor ikkje studere der du òg får jobb!»
Fleire samarbeidsprosjekt skal bidra til å auke studentrekrutteringa til UiS. Fram mot 2027 skal partane blant anna samarbeide om følgande:
- Kampanjar for å få fleire til å studere tekniske fag ved UiS
- Prosjekt for å bidra til at studentar får ein endå betre inngang til næringslivet og regionen ved semesterstart og gjennom studietida
- Formidle bachelor- og masteroppgåver både med problemstillingar frå næringslivet og frå studentar til næringslivet
- Trainee Sørvest skal hjelpe nyutdanna studentar inn i si første relevante jobb i regionen
- Karrieredagen laget til rette for studentar som er heime på juleferie
- Utvikle næringslivskonferansen i Verdiskapingsforum til eit større arrangement med eit endå spissare fokus på samarbeid mellom Universitetet og næringslivet
- Alumni-veke: eit sosialt og fagleg nettverk for alle som tek eller har teke ei utdanning ved UiS
Avtalen inneheld konkrete prosjekt med ansvarsfordeling i begge organisasjonane, og det er ein plan for framdrift og oppfølging.
Skal bidra til innovasjon og omstilling
Samarbeidet betyr også at Næringsforeningen og UiS i fellesskap skal bidra til oppbygging og styrking av relevante nærings- og fagområde og bidra til innovasjon, forsking og en kunnskapsbasert næringsutvikling.
Det står også i avtalen at partane skal jobbe for endå betre rammevilkår for Universitetet.
– Ved UiS er me svært glade for at det gode samarbeidet med Næringsforeningen i Stavanger-regionen blir fornya og vidareutvikla. Koblinga mellom universitetet og næringslivet er verdifullt for begge partar, og ikkje minst for utvikling og omstilling i regionen, seier UiS-rektor Klaus Mohn.
Tekst: Karen Anne Okstad, UiS