Minst eit halvt tusen ungdomar, foreldre og lærarar fylte campus då forskarnatt for ungdom vart arrangert for første gong i Stavanger. Tenåringane seier dei vart inspirerte til å studere ved UiS.
Det flotte haustvêret gjorde ramma perfekt for ein kveld med realfagsshow, mini-førelesingar, laboratorieomvisingar og forskingsstands. Det heile vart avslutta med eit spektakulært droneshow på himmelen over Ullandhaug.
Auka lysta på høgare utdanning
138 av ungdomane svara på eit evalueringsskjema som vart delt ut i løpet av kvelden. Resultata viser at ungdomane vart inspirerte og fekk meir lyst til å ta høgare utdanning. Her er nokre av resultata:
- Totaloppleving: 4,72 (av 5)
- 97 prosent vil anbefale arrangementet til andre
- 54 prosent seier kvelden har gjort det meir sannsynleg at dei vil søkje på høgare utdanning (29 prosent har allereie bestemt seg for å ta høgare utdanning)
– Ekstremt gøy!
Ungdomane kunne også legge inn eigne kommentarar, og desse var overveldande positive. Her er nokre døme:
– Veldig kjekt at det var mykje praktisk, og faktiske framstillingar av kva som vert gjort på dei ulike studia.
– Veldig spennande og kjekt. Gir meg kunnskap om kva eg kanskje kan tenkje meg å studere etter vidaregåande.
– Veldig interessant, spennande og lærerikt. Eg fekk så mykje meir lyst til å studere psykologi på UiS og skal garantert anbefale dette vidare!
– Likte alt veldig godt, men skulle ønskje vi fekk meir tid, slik at eg kunne høyrt fleire førelesingar og besøkt fleire labbar.
– Ekstremt gøy!!!
730 påmelde
Arrangementet stod på programmet til Forskningsdagane 2025, i tillegg til å vere ein del av Ulltra-festivalen og Stavangers 900-årsjubileum.
Målgruppa var ungdom frå vidaregåande skule og 10. klasse i heile Rogaland. UiS gav transportstøtte, slik at det kunne kome elevar frå Flekkefjord i sør til Haugesund i nord.
Over 700 ungdomar, foreldre og lærarar hadde meldt seg på arrangementet, som gjekk føre seg fredag 26. september 2025. Det er vanskeleg å seie kor mange som kom, men UiS anslår minimum 500.
Kontakt oss!
UiS har latt seg inspirere av NTNU, som i over 20 år har arrangert Ungdommens forskernatt i Trondheim. UiS sin versjon er gjort mogleg med bidrag frå Ulltra framtidsfestival, Universitetsfondet og Norges forskingsråd.
Under kan du sjå fleire bilete frå forskarnatta 2025. Har du spørsmål om arrangementet? Ta kontakt med rådgiver Camilla Larsen i Avdeling for kommunikasjon og samfunnskontakt.
Liss Anda heldt mini-føredrag om gaming og psykologi.
Studentforeninga ION Racing hadde stand.
Elevane fekk omvisning på ulike laboratorium, her på petroleumslaben med Dagfinn Sleveland
Ungdomane blei begeistra av realfagshowet med Fredrik Motland Kirkemo og Ida Soland Thu.
Kognitiv lab demonstrerte korleis ein kan lese hjernebølger.
Flott droneshow avslutta kvelden.