Ny professor ved Det helsevitskapelege fakultet

– Eg kjenner på ei indre glede og stoltheit over å få avslutta den akademiske karrieren min som professor, seier Ingunn Aase, ny professor ved UiS. 

Aase har arbeida 23 år i akademia og 20 år før det i klinisk praksis som sjukepleiar og leiar på nyfødd- og barneavdelingar. Ho går no over i stilling som professor emerita. 

Samarbeid og kvalitet i fokus 

– Gjennomgåande i forskinga mi har eg vore opptatt av å bidra med ny forskingsbasert kunnskap, utvikla forbetra utdanningstilbod med forskingsbasert undervisning og innovative læringsmetoder, og kvalitet i utdanning og i helsetenesta til det beste for pasientane, seier Aase.

Forskinga hennar omfattar tre tematiske område: 

• Tverrprofesjonell samarbeidstrening. 
• Kvalitetsbetring og opplæring i helsetenesta. 
• Innovative læringsmetodar og læringsmiljø. 

– Gjennom dei tre tematiske områda har eg hatt søkelys på læring og korleis læring kan tilretteleggast for å gi deltakaren; studenten og helsepersonell, auka kompetanse. Målet er å auka kvaliteten og pasienttryggleiken i helsetenestene, seier ho. 

– Samarbeid er viktig for meg 

Ho fortel vidare at ho tidleg såg viktigheita av tverrprofesjonelt samarbeid som leiar på barneavdeling der fleire profesjonar arbeidar saman. Dette blei òg tema for doktorgradsarbeidet hennar.  

– Hypotesen min er at dersom ein ikkje har hatt undervisning og trening med søkelys på tverrprofesjonelt samarbeid i utdanninga, kan ein ikkje forvente at ein som profesjonsutøvar meistrar dette når ein er ferdig utdanna og i jobb. 

Les meir om doktorgraden til Aase: Leger og sykepleiere må lære seg å samarbeide 

Som følgje av doktorgradsarbeidet hennar har eit forskingsbasert simuleringsopplegg blitt tatt i bruk i fleire utdanningar for å styrke pasienttryggleik og tverrfagleg teamarbeid. Blant dei er sjukepleiarutdanninga ved UiS som kvart år trenar saman med medisinstudentar frå Universitetet i Bergen. Ambulanselærlingar ved Stavanger Universitetssjukehus er ofte også med. 

– Å trena saman gir ei forståing for rollene i den andre yrkesgruppa. Det bygger respekt og lojalitet som igjen gir tryggare rammar for pasienten, seier ho. 

Innovative løysingar 

Etter fullført doktorgrad har Ingunn Aase vore involvert i forskingsprosjektet SAFE-LEAD.  Ho fortel at det er eit stort behov for å auke kunnskap om korleis vi kan styrke kompetansen innan kvalitet og tryggleik blant leiarar og tilsette i sjukeheim og heimetenestene.  

– Ein utfordring er at leiarar manglar gode verktøy i kvalitetsarbeidet. Derfor har vi i SAFE-LEAD utvikla, implementert og evaluert ein forskingsbasert leiarguide, eit verktøy som skal vera til hjelp for leiarar i kommunehelsetenestene når dei jobbar med dette, fortel ho. 

Aase har òg vore ein pådrivar for å ta i bruk innovative læringsmetodar i utdanning. Ho er aktiv med  å utvikle og pilot teste eit innovativt rettleiings- og vurderingsprogram retta mot kliniske studiar i sjukeheim: QUALinCLINstud.  Vidare har ho mellom anna laga podkast saman med to kollegaer, Previsitt på podkast, som no skal inngå i praksisførebuande undervisning til medisinsk praksis for sjukepleiarstudentar ved UiS. 

– Vi må tilpasse studietilbodet for at helsearbeidarane i framtida skal vere best mogleg førebudd i møte med ei digital helseteneste, og eg er ikkje redd for å ta i bruk nye og innovative læringsmetodar, til dømes simulering, podkast og video, men òg samarbeid med andre utdanningar på tvers av fakultet og institusjonar, legg ho til. 

Ein lagspelar 

Siri Wiig er leiar for SHARE – Senter for kvalitet og sikkerhet i helsetjenesten. Ho har samarbeida tett med Aase i over 10 år.  

– Ingunn har alltid delt kunnskapen og erfaringa si med glede, og vi kollegaer blir uendeleg glade når slike folk får kvalifikasjonsopprykk. Det er så fortent og gledeleg for henne, men òg oss andre rundt henne, seier ho.  

Ho beskriv Ingunn som ein lagspelar, ein som liker å jobbe i team og få til aktivitetar samen med andre. Ifølgje senterleiaren er ho som forskar framoverlent, positiv, innovativ og bidrar alltid med å få prosjekt ferdig og gjennomført på ein god måte. 

– Ingunn er fagleg sterk på fleire område relaterte til teamarbeid, kvalitetsbetring i praksis og utdanning. Ho har sett viktige spor med forskinga si, til dømes med det tverrfaglege simuleringsopplegget. Ho betyr mykje for mange både i praksisfeltet, for studentar, kollegaer og for forskingsmiljøet ho er ein del av, seier Wiig. 

Tekst: Cathrine Sneberg