Rettsvitskapsstudent Lene synest UiS er fremoverlente og synlege i samfunnsdebatten

Kvifor valde du å studere rettsvitskap?

Eg hadde studert helsevitskap og vore nokre år i arbeidslivet før eg søkte meg inn på rettsvitskap. I utgangspunktet kom motivasjonen til å søke av at eg såg det var eit stort behov for juridisk kompetanse innan mange område i næringslivet, og merka at særleg det avtalerettslege interesserte meg. Etter at eg begynte å studere ser eg at det er fleire rettsområde som er utruleg spennande. Jussen har rett og slett blitt min «passion».

Kvifor valde du Universitetet i Stavanger og Handelshøgskolen ved UiS?

Er er frå Stavanger-området og har studert eit par år på UiS tidlegare. Mi oppfatning var og er at Handelshøgskolen og UiS er fremoverlente og synlege i samfunnsdebatten. Det liker eg! Det er også stas at UiS har alt på eit campus. I tillegg til å gå på førelesing og lesesal kan du også her kjøpe pensumbøker, trene, ete god mat eller gå på bar.

Korleis ser ein typisk dag ut på UiS for deg?

Eg kombinerer å lese for meg sjølv heime med førelesinger og kollokviegrupper på campus. Eg liker godt å spise lunsj saman med studievener på Optimisten som er den største kantina på UiS, eller å ta ein kopp kaffi på bokkafeen i same bygg. Ofte er det mykje læring i at me diskuterer fag i ein litt meir uformell atmosfære.

Har du eit minne eller noko som du hugsar ekstra godt frå studietida til nå?

Me er så heldige at me har fått moglegheita til å vere med på mykje spennande. Eg må særleg trekke fram at me i forbinding med opplæring i folkerett hadde FN-panel kor me skulle representere ulike nasjonar i FN's sikkerheitråd. Oppgåva var å bli samd om ein resolusjon knytt til ein reell verdskonflikt. Dette var både morosamt og lærerikt.

Har du nokre råd for framtidige studentar?

Engasjer deg! Anten det er i JUFO (studentforeininga på rettsvitskap) eller andre verv. Dette gjer deg mange moglegheiter og du blir kjent med andre studentar og tilsette ved Universitetet.

For å lykkast med studiet så er mi oppfatning at det er nødvendig å jobbe jamnt og trutt med faga. Eg trur ein kombinasjon av lesing, og det å løyse oppgåver og diskusjonar med medstudentar, kan gje gode resultat. Like viktig er det å ta pausar og nyte studietida utanom det faglege også.

Les også: Rettsvitskap er eit av studieprogramma på UiS som skårer aller best i Studiebarometeret

Les også: Ja til master i rettsvitskap ved UiS!

Les også: Guro fikk ein forsmak på arbeidslivet i Stavanger tingrett

Les også: Jus-studentane fekk eit meir praktisk-orientert studieår med «Soft Skills»