Fadderfestivalen

Kva er fadderfestivalen?

Fadderfestivalen i Stavanger er ei heilt spesiell veke for alle nye studentar. Du kan bli kjent med medstudentane dine og få ein smakebit av det gode studentmiljøet i Stavanger.

Veka er for alle studentar som byrjar på eit nytt studium ved UiS. Det gjeld deg som er student for fyrste gong, deg som byter studieprogram, deg som byter lærestad, deg som tar eit forkurs, og deg som byrjar på eit masterprogram. Her er det noko for alle!

Konsertar og aktivitetar

Programmet til festivalen varierer frå år til år. Ein typisk fadderfestival består mellom anna av konsertar, quiz, foredrag, aktivitetar og omvising på campus og å bli kjent med linjeforeiningar og studentorganisasjonar.

Påmelding og faddergruppe

Etter at du har meldt deg på, får du ei faddergruppe saman med andre studentar på ditt studieprogram. Du får også ein «fadder». Det er ein student som skal ta vare på deg heile veka. Dei er ekspertar på UiS, Stavanger og ditt studieprogram!

Studentdriven festival

Fadderordninga ved UiS er eit studentdrive tiltak. Føremålet med fadderordninga er at du som ny student skal finne deg til rette både sosialt og fagleg ved universitetet.

Under fadderfestivalen blir det lagt vekt på relasjonsbygging, trivsel og samhald. I tillegg får studentane bli kjent med både Universitetet i Stavanger, Stavanger sentrum og nokre av områda rundt byen.