Utviklar simuleringstrening ved bruk av 360°-video

Europa har eit aukande behov for helsearbeidarar, delvis som følgje av ei aldrande befolkning med behov for langvarig pleie. Utdanning av helsearbeidarar, og særleg sjukepleiarar, inneber svært mykje praktisk trening. Dette gjer utfordringar når det gjeld tilgang til treningsfasilitetar, kostnadar og kvalitet i utdanningar. Bruk av 360° videoteknologi kan auka tilgangen til simuleringstrening, og med det kompensera for mangelen på tilgang til fasilitetar. 

Skal utvikle innovativ læringsmetodikk

360°-video er ei løysing der ein kan sjølv velja kvar ein vil sjå i bildet, og på denne måten delta aktivt i filmen. Videopptaket blir gjort med eit kamera beståande av to eller fleire vidvinkellinser som peikar i ulik retning, slik at alt rundt kameraet blir tatt opp.

Saman med tre europeiske universitet og tre selskap, skal UiS utnytta potensialet denne teknologien har innan undervisning. Gjennom å utvikla og gjera tilgjengeleg ein rimeleg 360° interaktiv videosimuleringsløysing, tar ein sikte på å lage engasjerande simuleringstrening for bruk i helseutdanning. Metoden vil gi undervisarar auka kompetanse innan produksjon av digitale verktøy, samt auke og gjere tilgjengeleg fleire digitale læringsverktøy over landegrenser.

Vidare ønskjer prosjektet å gi nye idear til bedrifter som utviklar tenester, produkt og teknologi inn mot undervisning.

På tvers av landegrenser

Prosjektet gir UiS moglegheit til å samarbeida med andre forskings- og undervisningsinstitusjonar, og dessutan kommersielle aktørar innan eit spennande fagområde.

Prosjektet blir leia av Universitetet i Stavanger, ved NETTOP og Det helsevitskaplege fakultet. Andre partnarar er University of Nottingham (Storbritannia), Catholic University of Valencia (Spania), Turku University of Applied Sciences (Finland), Screen Story (Norge), Quasar Dynamics (Spania) og ADE Animations Designs & Effects (Finland).

Les meir på 360ViSi-prosjektet si eiga heimeside (engelsk)