Du er invitert når Universitetet i Stavanger feirar høgdepunkt og framifrå prestasjonar.
Kvart år markerer Universitetet i Stavanger dagen då Kongen i statsråd vedtok at regionen skulle få eit universitet. Årsfesten er såleis ei fin anledning til å feire solide prestasjonar, ekstraordinær innsats og gode resultat.
Alle er invitert – både noverande og tidlegare studentar, ansatte og vennar av universitetet. Feiringa finn som vanleg stad i universitetet si eiga storstove, Tjodhallen. Sparebank 1 Sør-Norge og Lyse er på plass for å dele ut sine prisar for høvesvis innovasjon og forsking, og vi skal også dele ut Utdannings- og læringsmiljøprisen. Det blir doktorpromosjon med eit rekordhøgt antall nye doktorar, og musikalske innslag frå studentar ved Fakultet for utøvande kunstfag og Stavanger studentsangforening.
Vi skal sjølvsagt også feire at vi endeleg kan etablere profesjonsstudiet i psykologi. Festtalar i år er klinikksjef for psykisk helse for barn, unge og rusavhengige ved Stavanger Universitetssjukehus, Lotte Hansgaard.
Etter seremonien blir det servert kaffi og kake i foajeen i Kjølv Egelands hus. Bli med på feiringa!
Årsfesten startar med høgtideleg inngangsprosesjon. Vi ber deg difor vere på plass i Tjodhallen i god tid før seremonien tek til.
For gjestar som kjem utanfrå UiS:
Vi oppmodar alle som kan, til å reise bilfritt eller bruke kollektivtransport. Kjem du med bil, er det avgiftsparkering ulike stader på universitetsområdet.