Elevane lot seg engasjera av Jon Fosse sin vanskelege roman

- Absolutt ikkje, å velja krevjande og komplekse tekstar i vidaregåande skule kan tvert om skapa engasjement, refleksjon og djup læring, meiner universitetslektor ved Lesesenteret, Ingeborg Margrete Berge.

Ho har mange års erfaring som norsklektor i vidaregåande skule, og har fleire erfaringar med å lesa krevjande tekstar saman med elevane i klasserommet. I dag er Berge tilsett som universitetslektor ved Lesesenteret.

I 2017 sette ho i gong eit prosjekt saman med fleire norsklærarar på første trinn i vidaregåande skule. Klassane innan studiespesialisering skulle lesa «Andvake» av Jon Fosse.

Når elevane får ein vanskeleg tekst, har Berge ofte opplevd at dei les fort for å bli ferdige, ikkje stiller spørsmål til teksten og ventar passivt på vidare instruksar frå læraren. Målet med å å lesa Andvake med bruk av nærlesingstrategiar og litterære samtalar ynskja Berge saman med lærarane å snu på den strategien. Det var og eit poeng å ta seg tid til å lese heile teksten i klasserommet.

«Andvake» blei vald ut, og er eksemplarisk på den måten at boka er ganske typisk for forfattarskapen til Fosse og ho vert rekna for å vera blant det beste han har skrive.

Å finna teikn i teksten

For å skapa relevans fekk elevane i oppstarten ei kort innføring i hensikta med å nærlesa skjønnlitterære tekstar og at det å tolka og reflektera både munnleg og skriftleg er viktige ferdigheiter i norskfaget, så vel som i andre fag. Klassane brukte òg litt tid i forkant til å gjera seg kjend med forfattaren Jon Fosse.

Alle elevar hadde teksten føre seg og kunne følgje med mens klassen lytta til teksten på lydbok. Lyttinga vart delt opp i bolkar. Vidare nytta lærarane og klassane nærlesingsmetoden «teikn i teksten» (Bears & Probst, 2013).

- Det er ei lesemåte som opnar for djupare forståing ved å lese delar av teksten nøye og repetert og få støtte til å aktiverer sine eigne førekunnskapar om verda inn i teksten, seier Berge.

«Teikn i teksten» er ein metode kor det er seks teikn i teksten som er skildra nærmare og som lesaren får hjelp til å oppdaga. Vidare er det ankerspørsmål til kvart av teikna som skal opna for vidare tekstrefleksjon.

- Me såg at «teikn i teksten» opna for gode diskusjonar og refleksjonar når elevane etter lesinga blei delt inn i grupper for å samtala om det dei hadde lest, legg Berge til.

Fleire av elevane uttrykte at dei ikkje hadde for vane å lesa, lytta samstundes som dei satt med ein penn for å notera ned ting til vidare refleksjon, men at dette var god øving.

Lærarane som prøvde ut opplegget saman med Berge ynskja også å runda av opplegget med å ha ei munnleg vurdering kor elevane gruppevis samtalte om teksten. Her var læraren si rolle å leia samtalen ved å stilla opne spørsmål og sørga for at alle fekk ordet.

- Undervisningsopplegget fungerte godt når elevane blei merksame på at å samtala handlar om å lytta aktivt til det dei andre seier, og delta enten ved å utdjupa det andre hadde sagt, eller bringa samtalen vidare. Dialogane mellom elevane skapte noko ganske anna enn førebudde monologar som me kjenner godt frå elevframføringar, seier Berge.

Prøv ut krevjande litteratur i klasserommet

Undervisningsopplegget til «Andvake» og annan krevjande litteratur kan bidra til å utvikla munnlege ferdigheiter ved at samtalen mellom elevane er viktig i leseprosessen, i tillegg til å auke leseforståinga.

Berge og lærarane hadde ei evaluering i etterkant av opplegget. Fleire av elevane uttrykte stor undring og interesse i å vita korleis det kom til å gå med Asle og Alida vidare. Lærarane på si side rapporterte om stort, og til dels overraskande stort, engasjement bland elevane. Alle lærarane opplevde at å ha god tid til å gjennomføra opplegget var noko av det mest verdifulle, og at god tid gjorde at elevane også fekk nok tid til refleksjon. Lærarane var også positivt overraska over kor mykje elevane hadde forstått i tolkinga av ein så kompleks tekst.

Her kan du lesa heile Berges fagartikkel om gjennomføringa av «Andvake».

I Språkløypa «Norskfaglige praksiser» kan du også læra meir om vurdering av litterære samtalar og «teikn i tekst» som arbeidsmetode.