– Eg føler at me har vakse som pedagogar og klasseleiarar

Det seier Kristoffer som er PPU-student ved Fakultet for utøvande kunstfag. I ei veke har han vore med på eit nytt innovativt prosjekt om bærekraft.

Publisert 04. mai. 2023. Sist oppdatert 25. mar. 2024

Ti PPU-studentar innan musikk, song, dans, kunst og handtverk, og samfunnsfag med drama har laga til ei spennande og annleis veke for barneskuleelevar i Suldal kommune.

Elevar i gymsal som jobbar med tepper i bevegelse — Elevane får jobbe med temaet bærekraft i kunstfaga gjennom ulike stasjonar og i fellesskap

Dei vanlege timeplanane vart løyst opp, og skuledagane fokuserte på praksisprosjektet Bærekraftig utvikling – å utforske læring med praktiske og estetiske læreprosessar ved den fådelte skulen, der temaet bærekraft vart belyst gjennom praktiske og estetiske læreprosessar.

Dette er eit innovativt samarbeidsprosjekt mellom UiS, Høgskulen på Vestlandet (HVL), Desentralisert kompetanseutvikling (DeKomp) og Jelsa og Nesflaten skular.

Ein vinn-vinn-situasjon

– Me skal legge til rette for ei undervising som har si merksemd mot skaparglede, estetiske uttrykksformar og praktiske aktivitetar, som nå er sentrale perspektiv i opplæringas verdigrunnlag, seier rettleiar Kari Olene Oma Rønnes frå Fakultet frå utøvande kunstfag.

Prosjektet er laga ut frå den generelle læreplanen «Overordna del - verdiar og prinsipp for opplæringa» (Kunnskapsdepartementet, 2017). Her blir det gitt føringar om at elevane skal få oppleve «skaparglede, engasjement og utforskartrong» og at «elevane skal lære og utvikle seg gjennom sansing og tenking, estetiske uttrykksformar og praktiske aktivitetar».

To sett barnehender som jobber med å lage instrument av planker og tråd — Elevane fekk oppleve mange ulike praktiske oppgåver.

– Studentane vil erfare og oppleve ei praksisopplæring med ei anna metodisk tilnærming i og med at elevane i klasserommet er aldersblanda ved dei fådelte skulane. Og elevane ved Jelsa og Nesflaten vil møte skulekvardagen på ein annan måte. Dette blir ein vinn-vinn-situasjon, seier Oma Rønnes.

Har vakse som pedagogar

Dei ti studentane kjem både frå UiS og HVL. Kristoffer Nordal er ein av studentane frå UiS som deltok i praksisen. Han tar PPU i song og har i tidlegare praksisperiodar hovudsakleg undervist songtimar individuelt. Nå fekk han utforske songfaget i ein større klasse saman med barn.

– Det var utruleg gøy, og eg opplevde at det også var spennande, utfordrande og lærerikt å få lov til å vere med på dette praksisprosjektet.

Studentane fekk lov til å ta over timeplanen til både små- og mellomtrinnet i ei heil veke. Medstudentane hans hadde bakgrunn innan dans, kunst og handtverk, samfunnsfag, og musikk.

– Eg har lært masse om desse faga nå, og føler at me alle har vakse enormt som pedagogar og klasseleiarar. Eg trur også barna har hatt det utruleg gøy, og mange uttrykte at dei ønska seg meir av dei estetiske faga i skulekvardagen, seier Nordal.