Robert Kreuzbauer har fått opprykk til professor i strategi

Robert Kreuzbauer har ein doktorgrad i økonomi og administrasjon frå Universitetet i Innsbruck, og jobba før det som strategikonsulent innan design.

Hausten 2022 starta han på Handelshøgskolen ved UiS og på Avdeling for innovasjon, leiarskap og marknadsføring som førsteamanuensis, men fekk nyleg opprykk som professor i strategi.

– Eg utviklar teoriar for både bedrifts- og forbrukarstrategiar og testar dei hovudsakeleg med atferdseksperiment, men ofte også kombinert med ei blanding av empiriske metodar som økonometriske modellar, populasjonsdynamiske modellar og etnografiske studiar, seier Kreuzbauer.

Viktig å oppmuntre og hjelpe studentane

Han fortel at han alltid har samarbeida med industrien og offentlege tenester gjennom forsking, rådgjeving og undervising.

– Det viktigaste for meg i undervisinga er å ha fokus på å oppmuntre og hjelpe studentane til å utvikle eit konseptuelt rammeverk som dei kan bruke vidare for å analysere problem eller situasjonar som oppstår. På mine strategikurs lærer studentane eit sett med analytiske verktøy som lar dei undersøke ei bedrifts strategiske kjerneproblem i eit dynamisk konkurransemiljø.

Forskinga hans har blitt publisert i tidsskrift som Journal of Experimental Psychology: General, Journal of Product Innovation Management, Journal of the Royal Society og Current Directions in Psychological Science.

I tillegg har forskingsresultata hans blitt diskutert og tatt opp i media, blant anna på Austrian Broadcasting Corporation, the Austrian Press Agency og den danske avisa Weekendavisen.

Men han har også ambisjonar for framtida.

– I nær framtid ønsker eg å jobbe med lokale bedrifter, spesielt ved å integrere strategiske analyseverktøy og metodikk i forretningsbeslutningsprosessen.